Munaı baǵasy geosaıası jaǵdaılarǵa óte táýeldi - Úkimet basshysy

ASTANA. QazAqparat - Kiristerdiń bóliginiń 45 paıyzy negizinen munaı salasynan kelip túsetin qarjyǵa tıesili. Bul týraly búgin Parlament Májilisiniń jalpy otyrysynda QR Premer-Mınıstri Baqytjan Saǵyntaev málim etti. Májilismender «2017-2019 jyldarǵa arnalǵan respýblıkalyq bıýdjet týraly» zań jobasyn talqylaýda, dep habarlaıdy QazAqparat.

«Jumysymyzdy bastamas aldynda, ıaǵnı bir saǵat buryn munaıdyń baǵasy 46 dollar bolsa, al qazir AQSh-taǵy prezıdenttik saılaý qorytyndysy kezinde qazir baǵa 44 dollarǵa túsip otyr. Atap aıtqanda, munaı baǵasy geosaıası jaǵdaılarǵa óte táýeldi. Buǵan qosa, Iraktaǵy, Sırııadaǵy bolyp jatqan jaǵdaılar da áserin tıgizip jatyr. Ózderińiz búgingi talqylaýǵa salyp otyrǵan úsh jyldyq bıýdjetke qaraıtyn bolsaq, onda kirister bóliginiń 45 paıyzy negizinen munaı salasynan kelip túsetin qarjyǵa tıesili. Sol sebepten, biz bıýdjetti jobalaǵan kezde munaı jáne metall baǵasyna saqtyqpen qarap otyrmyz. Alaıda, Elbasynyń tapsyrmasy bar, osyǵan sáıkes bundaı jaǵdaıǵa qaramastan, halyqtyń aldyndaǵy barlyq áleýmettik mindettemeler tolyq qalpynda saqtalady»,-dedi Úkimet basshysy.

B. Saǵyntaevtyń sózine qaraǵanda, ekonomıkamyzdyń 27 paıyzy «kóleńkeli» jáne ony osydan shyǵarý úshin tıisti qadamdar atqarylýda.

Sonymen qatar ol Ulttyq qordyń jańa tujyrymdamasy daıyndalyp jatqanyna toqtala kele: «Ol jaqyn arada ázirlenedi. Bul jerde Ulttyq qor qarjysyn jumsap qana qoımaı, josparlaýdyń jańa joly eskeriledi»,-dedi.