Munaı baǵasy arzandaı túsýde
ASTANA. QazAqparat - Dúısenbidegi saýda-sattyq barysynan munaıǵa álemdik baǵa áli de tómendep jatqanyn baıqaýǵa bolady, buǵan Saýd Arabııasynyń jańa basshysy Salman ıbn Ábdel-Ázız Ál Saýdtyń «qara altyn» óndirisin burynǵy deńgeıde ustap turý sheshimi sebep bolýda, dep habarlady RIA Novostı.
Máskeý ýaqyty boıynsha 7.07-degi jaǵdaı boıynsha soltústikteńizdik Brent qospasyna naýryz aıyndaǵy fıýcherster quny O,95 paıyzǵa deıin tómendep, barreline 48,33 dollardy qurady. WTI markaly jeńil munaıyna naýryz aıyndaǵy fıýcherster quny 1,13 paıyzǵa tómendep, barreline 45,08 dollardy qurady.
Saýdtyń altynshy koroli Abdalla ótken aptada 91 jasynda dúnıeden ozyp, onyń ornyn inisi Salman basty, ol burynǵy basshynyń júrgizgen saıasatyn odan ári jalǵastyratynyn málimdegen. Munyń aıasynda munaıdyń álemdik baǵasy kóterilgen bolatyn, alaıda keıinirek ınvestorlardyń qaýiptenýine ákelgen naryqtaǵy «qara altynnyń» shekten tys molaıýy baǵanyń odan ári quldyraýyna sebep boldy.
«2008 jylǵy qarjy daǵdarysy kezeńindegi mólsherden de asyp túsken qordyń jınalý jyldamdyǵyn tómendetý úshin aldymen munaı óndirisin baıaýlatý qajet. Saýd Arabııasynyń naryǵy ótken aptada buǵan zorǵa den qoıǵanyna qaramastan, sheshim ózgerissiz qaldy. Sebebi korol Salman bul pikirinen aınymaı otyr», - dep málimdedi Blýmberg agenttigine Samsung Futures Inc taldaýshysy Hon Sýn Kı.
OPEK-tiń iri óndirýshi eli Saýd Arabııasy munaıǵa álemdik baǵanyń tómendeýi aıasynda munaı óndirýdi qoldaýdy uıymdastyrý strategııasyn ustanady, osylaısha naryqtaǵy óz úlesin saqtaǵysy keledi. Venesýela sııaqty shaǵyn óndirýshi elder, kerisinshe, sharalar qabyldaýǵa, «qara altynnyń» qunyn ustap turýǵa úndeýde.
