Munaı baǵasy 100 dollardan asatyn zaman qaıtyp oralmaıdy - T.Súleımenov

ASTANA. QazAqparat - Munaı baǵasy 100 dollardan asatyn zaman qaıtyp oralmaıdy. Bul týraly búgin Astana ekonomıkalyq forýmynyń «Ósýdiń jańa úlgisin izdeý jolynda» sessııasynda Eýrazııalyq ekonomıkalyq komıssııasy Ekonomıka jáne qarjy saıasaty alqasynyń múshesi Tımýr Súleımenov málim etti.

«Álemde jańa tehnologııalyq tártiptiń qalyptasyp jatqandyǵy aıqyn jaıt jáne onyń basty ereksheligi ekonomıkanyń energııa qamtymdylyǵynyń tómendeýi, tıimdiliktiń artýy men dástúrli energııa kózderinen sheginý bolyp otyr. Munaı men gazdyń álemdik ekonomıkada negizgi róldi oınaýy jalǵasa beretindigi sózsiz. Biraq, ol sońǵy birneshe onjyldyqtaǵydaı mańyzdy rólge ıe bola almaıdy. Biz boı úıretip alǵan munaıdyń óte joǵary baǵasy, 100 dollardan da joǵary bolatyn kezeńi qaıta oralmaýy múmkin ekendigin túsiný qajet. Bul bizdiń elderimiz júrgizýi tıis eonomıkalyq saıasatta óz izin qaldyrady», - dedi T.Súleımenov.

Onyń atap ótýinshe, bul rette ekonomıkalyq ósimge ákeletin quraldar toptamasy da kóp. Tek ulttyq sıpattaǵy da quraldar bar. Olar: ulttyq bıýdjettik-salyq, aqsha-nesıe, ónerkásiptik, tehnıkalyq jáne basqa da saıasattar.

«Degenmen, bizdiń kózqarasymyzsha, sońǵy jyldary ıntegratsııalyq kún tártibi de aıtarlyqtaı ilgerileı tústi. Ekonomıkanyń odan ary ósimi joldaryn izdeýde biz tek qana ulttyq quraldar toptamasyna arqa súıeýimiz qajet. Biz jan-jaǵymyzǵa, ózimizdiń taıaý kórshilerimizge qaraýǵa tıispiz. Osy rette Eýrazııalyq ekonomıkalyq odaqty qurý aǵymdaǵy kún tártibindegi syn-qaterlerge jaýaptardyń biri jáne odan arǵy ekonomıkalyq ósim úshin daıver sanalady», - dedi ol.