Munaı baǵasynyń ósýine baılanysty jalaqy ındeksatsııalanýy múmkin
ASTANA. KAZINFORM — Munaı baǵasynyń ósýine baılanysty jalaqy ındeksatsııalanýy múmkin. Bul týraly Premer-mınıstrdiń orynbasary Qanat Bozymbaev aıtty.
— Munaı-gaz kompanııalarymyzdyń tabysy aıtarlyqtaı ósetini sózsiz. Ózderińiz bilesizder, kezinde «golland aýrýynan» jaltarý úshin Ulttyq qor qurý týraly sheshim qabyldanǵan edi. shıkizat resýrstarynan túsetin salyqtar men salyqtan tys túsimderdiń basym bóligi búginde osy Ulttyq qorǵa shoǵyrlanady. Degenmen, respýblıkalyq ta, jergilikti bıýdjet te tabysty bolýy tıis. Óıtkeni, kompanııalardyń basym bóligi baj salyǵyn, eksporttyq tasymal salyǵyn tóleıdi. Olar munaıymyzdyń bir barreliniń qunyna baılanystyrylǵan. Sol sebepti salyq artady jáne respýblıkalyq bıýdjetke túsim bolýy tıis, — dedi Qanat Bozymbaev Parlament palatalarynyń birlesken otyrysynan keıin.
Vıtse-premer Úkimet Taıaý Shyǵystaǵy ahýaldy jiti baqylap otyrǵanyn, atalǵan aımaqtaǵy jaǵdaı turaqtalǵan jaǵdaıda munaı baǵasynyń tez arada burynǵy deńgeıge túsýi múmkin ekenin aıtady.
— Ózderińiz kórip otyrǵandaı, kóptegen el qorlaryn ashyp, naryqqa mol mólsherde munaı shyqty. Bul baǵany birshama turaqtandyrady. Ázirshe, alypsatarlyq baıqalady. Sondyqtan baıyppen eseptep, josparly rejımde ilgerileý kerek. Artyq aqsha bolsa respýblıkalyq ta, jergilikti de bıýdjetterge túsedi. Kompanııa mol tabys tapsa, jalaqyny kótere alady. Tabys salyǵy, jeke jáne áleýmettik salyqtar jáne basqalary da bıýdjetti tolyqtyrady. Sol kezde olar jalaqyny ındeksatsııalaý týraly qandaı da bir sheshim qabyldaı alady, — dedi ol.
Buǵan deıin Taıaý Shyǵystaǵy qaqtyǵys saldarynan gaz baǵasy kúrt óskenin jazǵan edik.
