Munaı baǵasy sońǵy jeti aıda eń joǵary deńgeıge jetti

ASTANA. KAZINFORM — AQSh pen Iran arasyndaǵy shıelenistiń kúsheıýine baılanysty munaı baǵasy ósti. Brent crude jáne West Texas Intermediate markaly munaı quny shamamen 1 paıyzǵa qymbattap, tıisinshe barreline 72,34 jáne 67 dollarǵa jetti. Apta qorytyndysy boıynsha baǵa shamamen 6,5%-ǵa ósip, sońǵy jeti aıdaǵy eń joǵary kórsetkishke kóterildi, dep jazdy BILD agenttigi.

Baǵanyń ósýine AQSh prezıdenti Donald Tramptyń Irannyń ıadrolyq baǵdarlamasyna qatysty daýda Tegeranǵa qysymdy kúsheıtken málimdemeleri túrtki boldy. Ol kelisimge kelý úshin on kúndik merzim berilgenin atap ótken.

Investorlar jaǵdaı ýshyǵa tússe, munaı jetkizýdiń mańyzdy baǵyttarynyń biri sanalatyn Ormýz buǵazy arqyly keme qatynasy buzylýy múmkin dep alańdaýly.

Phillip Nova kompanııasynyń sarapshysy Prııanka Sachdeva «qazir naryq joǵary deńgeıdegi alańdaýshylyq kúıinde» ekenin aıtty.

Aıta keteıik, álemdik munaı naryǵy buryn-sońdy bolmaǵan belgisizdik kezeńin bastan ótkerip jatyr. Bul jaǵdaı eń aldymen usynys tarapyndaǵy táýekelderdiń artýymen baılanysty.