Munaı baǵasy quldyrady, dollar «ushty»: Ulttyq bank valıýta naryǵy týraly aqparat taratty

ASTANA. KAZINFORM — 7 sáýirdegi jaǵdaı boıynsha bir apta ishinde (31 naýryz ben 7 sáýir aralyǵynda) 14,1%-ǵa tómendep, barreline $65-ten tómen tústi. Valıýta ındeksi bir apta ishinde 1,8%-ǵa álsiredi. Osy jaǵdaıǵa baılanysty Ulttyq bank valıýta naryǵy nege qubylyp turǵanyn túsindirýge tyrysty. 

— AQSh Prezıdenti Ákimshiliginiń birqatar saıası sheshimine baılanysty jahandyq qarjy naryqtarynda qubylmalylyq kúsheıgeni baıqalady. Saýda shıelenisi men protektsıonıstik rıtorıka kúsheıe berse, jahandyq retsessııa bastalýy múmkin degen naryq qatysýshylarynyń alańdaýshylyǵy da arta tústi, — delingen habarlamada.

Naryqtar táýekel etýge degen qulshynysty kúrt seıiltip, táýekeldi aktıvterdi qunsyzdandyrý arqyly osy jaǵdaıǵa reaktsııa bildirip jatyr. AQSh-taǵy negizgi qor ındeksteriniń dınamıkasy qazir teris aımaqta tur. Sonymen qatar, munaı baǵasy da aıtarlyqtaı arzandady.

— «Qara altynnyń» baǵasy 2025 jylǵy 7 sáýirdegi jaǵdaı boıynsha bir apta ishinde (31 naýryz ben 7 sáýir aralyǵynda) 14,1%-ǵa tómendep, barreline $65-ten tómen tústi. Bul — keıingi tórt jyldaǵy eń tómengi kórsetkish. Munaı óndirisine qoıylǵan shekteýlerdi tez arada alyp tastaýǵa qatysty OPEK+ uıymynyń buǵan deıin qabyldaǵan sheshimi jáne Azııa elderine barlyq munaı markasynyń bir barrelin $2,3-ke tómendetetini týraly Saýd Arabııasynyń málimdemesi munaı baǵasyna qosymsha qysym túsirdi. Osylaısha, baǵa 2022 jylǵy qazannan beri aıtarlyqtaı tómendedi, — dep jazdy Ulttyq bank. 

Málim bolǵandaı, munaı baǵasynyń quldyraýy men álemdegi belgisizdiktiń kúsheıýine baılanysty damýshy naryqtar (EM) men shıkizatqa negizdelgen ekonomıkalardyń valıýtasy álsirep jatyr. Osylaısha, EM elderiniń valıýta ındeksi bir apta ishinde 1,8%-ǵa álsiredi (2025 jylǵy 31 naýryz ben 7 sáýir aralyǵynda). Ońtústik Afrıka randy 7,3%-ǵa, Reseı rýbli 3,8%-ǵa, Brazılııa realy 3,5%-ǵa, Indonezııa rýpııasy 1,5%-ǵa, al Meksıka pesosy 1,1%-ǵa arzandady.

— Jahandyq naryqtardaǵy qubylmalylyqtyń artýy men negizgi eksport taýarlary baǵasynyń teris dınamıka berýinen 7 sáýir kúni KASE saýdasynda teńgeniń bırjadaǵy baǵamy 1 AQSh dollaryna 519,12 teńgeni qurap, aldyńǵy saýda kúninen beri 2,7%-ǵa álsiredi (bir apta ishindegi álsireý kórsetkishi — 2,9%). Ulttyq valıýtaǵa syrtqy faktorlar, sonyń ishinde álem boıynsha táýekel-sentımenttiń nasharlaýyna baılanysty beırezıdentterdiń shetel valıýtasyna degen suranysy artqany yqpal etip otyr, — dep túsindirdi bankten.

Suranystyń ósýi saýda kóleminiń ulǵaıýyna da áser etti: 7 sáýirdiń qorytyndysy boıynsha KASE-degi operatsııalar kólemi 456,4 mln AQSh dollaryna jetti. Bul — jyl basynan bergi bir kúndegi ortasha kólemnen shamamen eki ese artyq.

— Ulttyq Bank bıýdjet transfertteri men affınajdalǵan altyndy satyp alýǵa baılanysty aqsha-kredıt saıasatynyń beıtaraptyǵyn saqtaý maqsatynda shetel valıýtasyn satý operatsııalary arqyly Ulttyq valıýtaǵa qoldaý kórsetýdi jalǵastyrýda. Bul operatsııalar buǵan deıin jarııalanǵan kólemde júzege asyrylyp jatyr, — delingen bank habarlamasynda.

Ulttyq Bank valıýta naryǵyndaǵy jaǵdaıdy baqylaýda ustap otyrǵanyn, sondaı-aq, qajet bolǵan jaǵdaıda, aıyrbas baǵamyn turaqsyzdandyratyn shamadan tys qubylmalylyqqa jol bermeý úshin qajet sharalardy qabyldaýǵa daıyn ekenin habarlady. 

Aıta ketelik, búgin Astana men Almaty qalalaryndaǵy aqsha aıyrbastaý pýnktterinde dollar 505 — 512 teńgeden saýdalanyp jatyr.