Munaı baǵasy qubyldy: Brent qymbattap, WTI arzandady
ALMATY. KAZINFORM — Munaı naryǵyna Taıaý Shyǵystaǵy shıelenistiń saqtalýy áser etip jatyr.
2026 jyldyń 17 tamyzyndaǵy jaǵdaı boıynsha Brent markaly munaıdyń barreli 0,28 tsentke qymbattap, 88,80 dollarǵa jetti. Osylaısha, Brent munaıy ótken aptada kóterilgen mejesin ustap tur.
WTI markaly munaı baǵasy 4 tsentke arzandap, barreli 82,36 dollardan saýdalanyp jatyr. Reseılik Urals munaıynyń baǵasy 78 tsentke tómendep, barreline 84,08 dollar boldy.
Taıaý Shyǵystaǵy shıelenis naryqqa yqpal etip otyr jáne tasymaldaýdyń toqtaýyna qatysty alańdaýshylyqty kúsheıte túsedi. Demalys kúnderi Izraıl Lıvanǵa jańa soqqylar jasap, saldarynan 11 adam qaza tapty. Al Ormýz buǵazynda ADNOC munaı kompanııasynyń eki kemesi shabýylǵa ushyraǵany habarlanǵan edi.
Sonymen qatar Iran Parsy shyǵanaǵyndaǵy Hark aralynda ornalasqan batys termınalynda 25 kúndik shekteýden keıin munaı jóneltýdi qaıta jandandyrdy. Hark araly — Iran munaı ınfraqurylymynyń negizgi ortalyqtarynyń biri. Ondaǵy termınaldar arqyly ırandyq munaı eksportynyń shamamen 90%-y júzege asyrylady.
Odan bólek Iran men Oman Ormýz buǵazy arqyly ótetin teńiz baǵdarlarynyń kartasy boıynsha kelisimge keldi.
