Munaı baǵasy qaıta kóterilip, Brent 80 dollardan asty
ASTANA. KAZINFORM — Álemdik munaı baǵasy Iran tóńiregindegi shıelenis pen shıkizat jetkizilimine qatysty qaýipterdiń kúsheıýine baılanysty 1%-dan astam ósti.
6 tamyzdaǵy keshki jaǵdaı boıynsha Brent markaly munaıdyń qazan aıyndaǵy fıýchersteri 1,04% ósip, barreli 80,28 dollar boldy. Al amerıkalyq WTI munaıy 0,81% qymbattap, barreli 75,83 dollarǵa jetti.
Reuters málimetinshe, ınvestorlar Iran men Oman arasyndaǵy kelissózderge qatysty aqparatty saqtyqpen baqylap otyr. Naryq qatysýshylary yqtımal kelisimder geosaıası shıelenisti qysqa merzimde báseńdete alatynyna kúmán keltiredi. Buǵan deıin jasalǵan kelisimderdiń kópshiligi uzaqqa sozylmaǵan.
Munaı baǵasynyń ósýine jetkizilimderge qatysty qaýip te áser etip otyr. Agenttik málimetinshe, Iemendegi hýsıtter Qyzyl teńiz ben Aden shyǵanaǵynda Saýd Arabııasynyń tankerlerine shabýyl jasaǵanyn málimdedi. Al Iran AQSh tarapynan jańa soqqylar jasalǵan jaǵdaıda Parsy shyǵanaǵyndaǵy elderdiń energetıkalyq ınfraqurylymyna jaýap sharalaryn qoldanýy múmkin ekenin eskertti.
Sonymen birge Saýd Arabııasynyń qyrkúıek aıynda azııalyq satyp alýshylar úshin Arab Light markaly munaıdyń resmı satý baǵasyn sál tómendetýi naryqqa kesirin tıgizdi. Degenmen sarapshylardyń pikirinshe, geosaıası ahýaldyń shıelenisýi munaı baǵasynyń ázirge joǵary deńgeıde saqtalýyna yqpal etip otyr.
Buǵan deıin OPEK+ qyrkúıekten bastap munaı óndirý kólemin arttyrý týraly kelisimge kelgenin habarlaǵanbyz. OPEK±ke kiretin jeti el, onyń ishinde Qazaqstan, Saýd Arabııasy jáne Reseı 2026 jylǵy qyrkúıekten bastap munaı óndirýdi táýligine 188 myń barrelge arttyrýǵa kelisti. Bul sheshim álemdik munaı naryǵyndaǵy turaqtylyqty qoldaý maqsatynda qabyldandy.
