Munaı baǵasy, Eýroodaqtyń saýda saıasaty – Tramp Davosta ne aıtty

ASTANA. KAZINFORM – AQSh prezıdenti Donald Tramp NATO-ǵa múshe elderden qorǵanysqa bóletin qarajatty jalpy ishki ónimniń 5 paıyzyna deıin kóterýdi talap etti. Bul týraly Kazinform agenttigi Euronews-ke silteme jasap habarlaıdy.

Eýroodaq pen NATO-ǵa sálem

Davostaǵy Dúnıejúzilik ekonomıka forýmy – Donald Tramptyń Aq úı basshylyǵyna qaıtyp kelgennen beri qatysqan alǵashqy iri halyqaralyq sharasy. Beınekonferentsııada sóz sóılegen AQSh basshysy Eýropadaǵy odaqtastarynan qorǵanysqa arnalǵan shyǵyndy kóbeıtýdi talap etti. Degenmen, ol Ýkraınadaǵy soǵysty toqtatýdyń basty tetigi munaı baǵasyn túsirý amaly bola alatynyn aıtty.

Sondaı-aq ol qosylǵan qunnyń ǵalamdyq tizbeginen eleýli úles alyp otyrǵan alpaýyt óndirýshilerge óndiristerin qaıtadan AQSh aýmaǵyna shoǵyrlandyrý kerektigin qaıtalap eske saldy. Onyń bul turǵydaǵy tezısi «Amerıkada óndir, áıtpese, baj tóle» degen qaǵıdatqa saıady.

Aıtýynsha, AQSh aýmaǵynda taýar óndiretin kompanııalardyń korporatıvtik tabys salyǵy 21%-dan 15%-ǵa túsirilmek.

AQSh prezıdenti Eýropalyq odaqtyń ınvestıtsııa tartý isinde bıýrokratııaǵa belshesinen batqanyn, saýda saıasatynda amerıkalyq óndirýshilerge ádiletsiz qaraıtynyn synady.

- Eýroodaq bizdiń aýylsharýashylyq ónimderimizdi qabyldamaı otyr. Bizdiń avtomobılderdi de qabyldamaıdy. Sóıte turyp bizge mıllıondaǵan kóligin jóneltip jatyr, - dedi ol.

D.Tramptyń paıymdaýynsha, jyldar boıy Eýropalyq Odaq pen AQSh arasynda teńgerimsiz saýda baılanysy ornaǵan.

Aq úı basshysy NATO-ǵa múshe elderdiń qorǵanysqa jumsaıtyn qarajaty jalpy ishki óniminiń 2 paıyzyna teń bolý kerek deıtin meje de az dep oılaıtynyn qadap aıtty.

- Men NATO elderinen qorǵanysqa jumsaıtyn shyǵyndaryn jalpy ishki ónimniń 5%-yna deıin kóterýdi suramaqpyn. Negizi kóp jyl buryn osylaı isteý kerek bolǵan, - dedi ol.

Ýkraına máselesi

Donald Tramp Ýkraınadaǵy soǵys týraly aıtqanda munaı baǵasyna erekshe toqtaldy.

Munaı baǵasyn túsirý úshin Saýd Arabııasy men OPEK uıymyna qysym jasaýǵa ýáde berdi. Bul josparyn soǵysty toqtatyn basty kúsh áskerı kómek emes, ekonomıkalyq shara bola alatynymen baılanystyrdy.

- Men jaqyn arada Reseı prezıdenti Vladımır Pýtınmen kezdeskim keledi, - dedi AQSh prezıdenti.

D.Tramp kelissóz qandaı sharttar aıasynda ótetinin naqtylamasa da «Ýkraına mámlege daıyn», - degendi aıtty.

Eki kún buryn ol Reseıdi Ýkraınadaǵy áskerı qaqtyǵysty toqtatý jóninde kelissózder júrgizýge shaqyryp, dıplomatııa qajet ekenin aıtqan bolatyn.

Eýropa gazdy kimnen alady

AQSh prezıdentiniń aıtýynsha, Amerıkanyń suıytylǵan tabıǵı gaz eksportyn qysqartý týraly jospary Eýropaǵa kesirin tıgizbeıdi.

- Mámle jasaımyz desek, jasaımyz – suraǵandaryńyzdy alasyzdar, - dedi ol TotalEnergies-tiń bas dırektory Patrık Pýıannege qaratyp.

Osyǵan deıin Tramptyń mıgratsııalyq saıasaty Qazaqstanǵa qalaı áser etetini týraly sraapshylardyń pikirin bergen edik.