Munaı baǵasy bir aptada 10%-dan astam ósti
ASTANA. KAZINFORM – Iran tóńiregindegi jaǵdaıdyń ýshyǵýy aıasynda álemdik munaı baǵasy qaıta qymbattady.
13 shilde tańerteńgi jaǵdaı boıynsha Brent markaly munaıdyń baǵasy 4%-ǵa nemese 3,04 dollarǵa ósip, bir barreli 79,05 dollarǵa jetti.
WTI markaly munaı fıýchersteriniń quny da 4,09%-ǵa nemese 2,92 dollarǵa kóterilip, barreline 74,33 dollar boldy.
Al Reseıdiń Urals markaly munaıy bir barreli úshin 55,12 dollardan saýdalandy.
Sarapshylardyń baǵalaýynsha, naryqtaǵy ósimge Taıaý Shyǵystaǵy geosaıası shıelenistiń kúsheıýi áser etken.
Eske salsaq, 8 shildede AQSh Iran munaıyn satýǵa qatysty sanktsııalardy qaıta engizdi. Buǵan Ormýz buǵazy mańynda munaı jáne suıytylǵan tabıǵı gaz tasymaldaıtyn tankerlerge jasalǵan shabýyldar sebep bolǵan.
Keıin Aq úı Iran aýmaǵyndaǵy nysandarǵa aýqymdy soqqylar bastalǵanyn málimdedi.
Osydan keıin munaı jetkizilimine qaýip tónýi múmkin degen alańdaýshylyq kúsheıip, álemdik naryq birden reaktsııa tanytty. Sanktsııalar jarııalanǵannan keıin Brent markaly munaıdyń baǵasy alǵash ret 24 maýsymnan beri barreline 76 dollardan asyp, 5%-dan joǵary qymbattady.
Bir apta buryn, 6 shildede Brent markaly munaıdyń bir barreli 71,69 dollar bolǵan edi. Osylaısha bir apta ishinde onyń baǵasy shamamen 10,3%-ǵa ósti.
