Munaı baǵasy barreline 160 dollarǵa deıin jetýi múmkin — ExxonMobil
ASTANA. KAZINFORM — ExxonMobil kompanııasynyń aǵa vıtse-prezıdenti Nıl Chepmen aldaǵy aptalarda energııa tasymaldaýshylar baǵasy kúrt qymbattaýy múmkin ekenin eskertti, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.
Nıý-Iorkte ótken Bernstein konferentsııasynda sóılegen sózinde Chepmen strategııalyq munaı qorlarynyń taýsylýyna baılanysty aldaǵy aptalarda shıki munaı baǵasy barreline 160 dollarǵa deıin kóterilýi múmkin ekenin aıtty.
— Shıki munaıdyń jáne benzın, dızel otyny, avıatsııalyq kerosın sekildi basqa da suıyq otyn túrleriniń kommertsııalyq qorlary azaıyp ketti. Bul jaǵdaıdyń saldary strategııalyq munaı qorlaryn bosatý arqyly jumsartyldy. Mundaı qadamdy Batys elderiniń kópshiligi jasady. Osy faktorlardyń barlyǵy naryqqa tıgen soqqyny jeńildetti, — dep túsindirdi Nıl Chepmen.
Onyń aıtýynsha, sońǵy alty apta boıy munaı baǵasynyń barreline 90–110 dollar aralyǵynda saqtalýy uzaqqa sozylmaıdy. Eki-úsh apta ishinde baǵa kúrt ósip, álemdik naryqta shıki munaı quny 150–160 dollarǵa deıin jetýi múmkin.
S& P Global derekterine sáıkes, munaı baǵasy AQSh pen Izraıldiń Iranǵa qarsy áskerı operatsııalary bastalǵanǵa deıingi deńgeıden áli de aıtarlyqtaı joǵary. Aqpan aıynyń sońynda munaıdyń bir barreli shamamen 75 dollar turǵan bolatyn.
Buǵan deıin Taıaý Shyǵystaǵy shıelenis kúsheıgen saıyn munaı da qymbattap bara jatqanyn jazdyq.
