Munaı baǵasy barreline 100 dollarǵa deıin kóterilýi múmkin
ASTANA. KAZINFORM — AQSh pen Izraıldiń Iranǵa jasaǵan shabýylynan keıin Brent markaly munaıdyń baǵasy bırjadan tys saýdada 10%-ǵa ósip, shamamen barreli 80 dollarǵa jetti, dep habarlaıdy DW.
Sarapshylar baǵanyń barreli 100 dollarǵa deıin kóterilýi múmkin ekenin boljaıdy.
— Áskerı shabýyl munaı baǵasyn qoldap otyrsa da, sheshýshi faktor Ormýz buǵazynyń jabylýy. Biz demalys kúnderinen keıin baǵa barreline 100 dollarǵa jaqynbolady dep kútemiz jáne eger sý joly jabyq kúıde qalsa, odan asyp ketýi múmkin, — dedi ICIS analıtıkalyq kompanııasynyń ókili Adjaı Parmar.
RBC jáne Barclays sarapshylary da bul pikirge qosylady. OPEK+ karteliniń negizgi músheleri sáýir aıynan bastap munaı óndirýdi buryn josparlanǵan 137 myń barrel/táýlik emes, 206 myń barrel/táýlikke arttyratynyn habarlady.
Alaıda Rystad Energy kompanııasynyń analıtıgi Horhe Leon, 2 naýryzdaǵy saýda ashylǵan kezde Irandaǵy jaǵdaıǵa baılanysty munaı baǵasynyń ósýin boldyrmaý úshin óndiristi ulǵaıtý jetkiliksiz bolýy múmkin dep eskertti.
— Kommertsııalyq tasymaldaýshylar Ormýz buǵazyndaǵy raketalyq soqqy, osy baǵyttaǵy keme saqtandyrý kelisimderiniń toqtatylýy jáne Parsy shyǵanaǵy aımaǵyndaǵy elektrondyq sıgnaldardyń úzilýinen qorqyp otyr, — dedi SPI Asset Management basqarýshy seriktesi Stıven Innes AFP agenttigine.
Onyń baǵalaýynsha, buǵazdyń jabylýy munaı baǵasyn eskalatsııaǵa deıingi shamamen 72 dollardan dúısenbi kúni saýda ashylǵan kezde 120–150 dollarǵa deıin kóterýi múmkin.
Basqa sarapshylar Saýd Arabııasy men BAÁ jerústi qubyrlaryn buǵazdy aınalyp ótý úshin paıdalanýǵa bolatynyn aıtty, biraq sol jaǵdaıda da naryqta táýligine shamamen 8–10 mln barrel tapshylyq týyndaıdy.
Buǵan deıin biz AQSh pen Izraıldiń Iranǵa qarsy júrgizgen aýqymdy áskerı operatsııasynan keıin jahandyq energetıkalyq naryqtar munaı baǵasynyń kúrt aýytqýyna daıyndalyp jatqanyn habarlaǵan edik.