Munaı baǵasy barreline 100 dollardan asty
ASTANA. KAZINFORM – Brent markaly munaıdyń baǵasy mamyr aıynan beri alǵash ret barreline 100 dollardan asty. Buǵan Iran qoldaıtyn Iemendegi hýsıt qozǵalysynyń 23 shildede Qyzyl teńizde Saýd Arabııasynyń eki munaı tankerine soqqy jasaǵanyn málimdeýi sebep boldy, dep habarlaıdy BBC.
Hýsıtter Qyzyl teńizde Encelia jáne Layla tankerlerine zymyrandar men ushqyshsyz ushý apparattary arqyly shabýyl jasaǵanyn málimdedi.
Saýd Arabııasynyń SPA memlekettik aqparat agenttigi resmı derekkózge silteme jasap, Encelia tankerine soqqy jasalyp, saldarynan kemeniń tumsyq bóliginde órt shyqqanyn habarlady.
Ulybrıtanııanyń teńiz táýekelderin basqarýmen aınalysatyn Vanguard kompanııasy da Encelia tankerine snarıad tıgenin rastady. Al Layla tankerine shabýyl jasalǵany týraly aqparat ázirge rastalǵan joq.
Bul – Iran qoldaıtyn toptyń Saýd Arabııasyna qarsy «teńiz embargosyn» jarııalaǵannan keıingi alǵashqy shabýyly.
Hýsıtterdiń áreketine baılanysty beısenbi kúni Brent markaly munaıdyń baǵasy 6 paıyzǵa qymbattap, barreline 100 dollardan asty.
Bloomberg agenttiginiń málimetinshe, Qazaqstanda Reseıdiń Qara teńiz jaǵalaýyndaǵy Kaspıı qubyr konsortsıýmy termınaly jumysynyń toqtaýyna baılanysty munaı óndirý kóleminiń qysqarýy, álemdik qorlardyń azaıýy jáne AQSh pen Iran arasyndaǵy qaqtyǵystyń ýshyǵýy da munaı baǵasyna qosymsha qysym jasap otyr.
Aıta keteıik, buǵan deıin elimizde munaı óndirý kólemi ýaqytsha tómendetilgenin jazdyq.
