Qyrǵyzstannyń memlekettik organdary energııa tutynýǵa shekteý engizedi

ASTANA. KAZINFORM — ASTANA.KAZINFORM — Qyrǵyzstan Mınıstrler Kabınetiniń sheshimimen energııa tıimdiligin arttyrý jáne elektr energııasyn tıimdi paıdalaný sharalary engiziledi, dep habarlaıdy Kazinform agenttiginiń menshikti tilshisi.

Úkimettiń habarlaýynsha, elektr energııasyn únemdeý maqsatynda ákimshilik úkimettik ǵımarattarda ishki jáne syrtqy jaryqtandyrý jáne elektr qurylǵylaryn paıdalaný saǵat 18:00–den 06:00–ge deıin shekteledi.

Bul táýlik boıy jumys isteıtin jáne qorǵanys, qaýipsizdik, densaýlyq saqtaý, áleýmettik qorǵaý jáne memlekettik qyzmetterdi kórsetetin strategııalyq nysandar men uıymdarǵa qoldanylmaıdy.

Bul sharalardy engizý energııa tıimdiligin aıtarlyqtaı jaqsartady, nátıjesinde aıyna shamamen 40 mıllıon kılovatt-saǵat únemdeledi.

Aıta ketý kerek, bıylǵy jyldyń alǵashqy toǵyz aıynda elde elektr energııasyn tutyný shamamen 1 mıllıard kılovatt-saǵatqa ósti. Toqtoǵul sý qoımasyndaǵy qazirgi sý deńgeıi ótken jyldyń sáıkes kezeńimen salystyrǵanda 2 mıllıard tekshe metrge tómen.

— Bul jaǵdaı sý jáne energetıkalyq resýrstardy utymdy basqarýǵa belsendi kózqarasty talap etedi. Mınıstrler kabınetiniń basty maqsaty — Toqtaǵul sý qoımasyndaǵy sýdy utymdy paıdalaný jáne energetıkalyq jabdyqtarǵa túsetin júktemeni ońtaılandyrý, bul búkil energetıkalyq júıeniń senimdi jumys isteýi úshin óte mańyzdy, — delingen málimdemede.

Buǵan deıin Qyrǵyzstannyń energetıka mınıstri Taalaıbek Ibraev «Kabar» aqparat agenttigine bergen suhbatynda azamattarǵa aldaǵy qys týraly eskertip, energııany únemdeýge shaqyrǵan bolatyn.

Qyrǵyzstan prezıdenti Sadyr Japarov energetıka mınıstri Taalaıbek Ibraevtyń áreketin qatań synǵa alyp, sheksiz elektr energııasy tarıfin toqtatýdy buıyrdy.

Aıta keteıik, Qyrǵyzstannyń energetıka salasynda 2023 jyldyń 1 tamyzynan 2026 jyldyń 31 jeltoqsanyna deıin tótenshe jaǵdaı jarııalandy. Energetıka mınıstriniń aıtýynsha, el 2028 jylǵa qaraı qýattylyqty arttyrý arqyly energetıkalyq daǵdarysty jeńe alady.