Munaı baǵasy 2022 jyldan beri alǵash ret 100 dollardan asty
ASTANA. KAZINFORM – Irandaǵy soǵys saldarynan munaı baǵasy shamamen 20%-ǵa ósip, 2022 jylǵy deńgeıge jetti. Munaı naryǵyndaǵy negizgi faktorlardyń biri Ormýz buǵazynyń uzaq ýaqytqa jabylý múmkindigine baılanysty alańdaýshylyq bolyp otyr, de jazady DW.
AQSh pen Izraıl Iranǵa qarsy soǵys pen Ormýz buǵazynyń jabylýy aıasynda munaı baǵasy 2022 jyldan beri alǵash ret 100 dollardan asty. Dúısenbi, 9 naýryz kúni saýda bastalǵan sátte Eýropada etalon sanalatyn Brent markaly munaı fıýchersteri bir mezette shamamen 20%-ǵa qymbattap, barreline (159 lıtr) 111,04 dollarǵa deıin kóterildi. Bul týraly Reuters agenttigi habarlady.
Al amerıkalyq West Texas Intermediate (WTI) markaly munaı fıýchersteri 16,8%-ǵa ósip, 106,17 dollarǵa jetti. Buǵan deıin saýda barysynda baǵa 111,24 dollarǵa deıin kóterilgen.
Juma, 6 naýryz kúni mamyr aıynda jetkiziletin Brent markaly munaı baǵasy 2024 jyldyń sáýirinen beri alǵash ret 90 dollardan asty. Al Iranǵa qarsy áskerı operatsııa bastalǵanǵa deıin, ıaǵnı 28 aqpanǵa deıin, munaı shamamen 70 dollar deńgeıinde saýdalanyp kelgen.
Ormýz buǵazy uzaq ýaqytqa jabylýy múmkin be
Munaı naryǵyndaǵy basty qaýipterdiń biri —Ormýz buǵazynyń uzaq ýaqytqa jabylyp qalý qaýpi. Beıbit kezeńde bul buǵaz arqyly álemdik munaı kóleminiń shamamen 20%-y tasymaldanady. Sondaı-aq ol suıytylǵan tabıǵı gazdy, ásirese Qatardan jetkizý úshin de strategııalyq mańyzǵa ıe.
Álemdik munaı naryǵyndaǵy shıelenis kúsheıgen tusta Skot Bessent 6 naýryz kúni AQSh úkimeti tankerlerge tıelip qoıǵan reseılik munaıǵa qatysty sanktsııalardy jeńildetý múmkindigin qarastyryp jatqanyn málimdedi.
Sol kúni AQSh Úndistandaǵy munaı óńdeý zaýyttaryna tankerlerge tıelip qoıǵan reseılik munaıdy satyp alýǵa salynǵan shekteýden 30 kúnge bosatý týraly sheshim qabyldady. Bul shara munaıdyń álemdik naryqqa jetkizilýin jalǵastyrý maqsatynda jasalǵan.
Irannyń munaı ınfraqurylymyna áýedan soqqy jasaldy
7 naýryz kúni Izraıl alǵash ret Irannyń munaı ınfraqurylymyna áýeden soqqy jasady. Shabýyl Tegeran qalasy men onyń mańyndaǵy bes energetıkalyq nysanǵa baǵyttalǵan.
Buǵan jaýap retinde Islam revolıýtsııasy saqshylar korpýsy Parsy shyǵanaǵy elderindegi munaı nysandaryna soqqy berýi múmkin ekenin eskertti.
- Eger barreline 200 dollardan asatyn munaı baǵasyna tóze alsańyzdar, onda osy oıyndy jalǵastyra berińizder, — dep keltirdi uıym ókiliniń sózin The Guardian gazeti.
Aıta keteıik, osyǵan deıin AQSh prezıdenti Donald Tramp Taıaý Shyǵystaǵy qaqtyǵys aıasynda munaı baǵasynyń kúrt ósýi ýaqyt óte túzeletinin jáne bul jahandyq qaýipsizdik úshin óteletin shaǵyn ǵana tólem ekenin málimdedi