Munaı azaıdy: Qyzylorda oblysynda onyń ornyn qandaı salalar basady
QYZYLORDA. KAZINFORM — Qyzylorda oblysynda munaı ken oryndary sarqylyp keledi. Sonyń saldarynan «qara altyn» óndirý kólemi tómendep ketti.
Oblystyq kásipkerlik jáne ónerkásip basqarmasynyń málimetinshe, keıingi 5 jylda munaı óndirý kólemi 1,3 mln tonnaǵa qysqardy.
— Budan ekonomıkany ártaraptandyrý qajet ekeni sezildi. Qabyldanǵan sharalardyń nátıjesinde 5 jylda ónerkásip qurylymyndaǵy munaı óndirý salasynyń úlesi 15%-ǵa tómendedi. Esesine óńdeý ónerkásibiniń úlesi 10%-ǵa artyp, ekonomıkanyń shıkizatqa táýeldiligi birtindep azaıa bastady, — dedi basqarma basshysy.
Ekonomıkany ártaraptandyrý maqsatynda aldaǵy úsh jylda 48 ınvestıtsııalyq joba júzege asyrylyp, 10 myńnan astam jańa jumys orny ashylady.
Aımaqtyń damý ereksheligine sáıkes negizgi basym baǵyttar aıqyndaldy. Olar — agroónerkásip kesheni, qurylys ındýstrııasy, hımııa ónerkásibi, energetıka, taý-ken metallýrgııa jáne kólik-logıstıka ınfraqurylymy salalary.
Eske salaıyq, jýyrda Aral qalasynda joǵary surypty as tuzyn óndirý zaýyty ashyldy.
