Munaı arzandady, teńge álsiredi — naryq ne deıdi
ASTANA. KAZINFORM — Munaı baǵasy OPEK+ tarapynan óndirý kóleminiń taǵy da ulǵaıýy kútilgendikten 2,4%-ǵa tómendedi. Alıans músheleri óndirý kólemin kem degende táýligine 137 myń barrelge arttyrýdy maquldaýy múmkin degen joǵary yqtımaldyq bar, dep jazdy Qazaqstan qarjygerler qaýymdastyǵy.
Valıýta naryǵy
Dúısenbi kúngi saýda qorytyndysy boıynsha USD/KZT jubynyń ortasha ólshengen baǵamy 1 AQSh dollaryna 548,77 teńgeni qurady (+4,32 teńge), saýda kólemi — 286,6 mln dollar (-47,8 mln). Teńgeniń álsireýi munaı baǵasynyń arzandaýy aıasynda, sondaı-aq aı sońynda shetel valıýtasyna suranystyń dástúrli túrde artýymen baılanysty boldy. Bul suranys ımporttyq kelisimsharttar boıynsha tólemder men syrtqy qaryzdy óteý boıynsha mindettemelerin oryndaıtyn qazaqstandyq kompanııalar tarapynan týyndaıdy. Eske sala keteıik, teńgeniń shamadan tys álsireýi ımporttyq taýarlardyń qymbattaýyna jáne tutyný baǵalaryna valıýta baǵamynyń áser etýi arqyly ınflıatsııanyń ósýine ákelýi múmkin.
Búgin basty nazarda — óndiristik ádispen esepteletin JІÓ, tólem balansy, syrtqy qaryz, halyqaralyq ınvestıtsııalyq pozıtsııa, halyqaralyq rezervter men Ulttyq qordyń valıýtalyq aktıvteri jónindegi derekterdiń jarııalanýy.
Aqsha naryǵy
Aqsha naryǵyndaǵy kiristilik kórsetkishteri júıedegi ótimdilik profıtsıtiniń salystyrmaly túrde turaqty deńgeıinde túzetildi. TONIA mólsherlemesi 15,91%-dan 15,74%-ǵa deıin tómendedi, al SWAP-1D kiristiligi 11,28%-dan 11,02%-ǵa deıin tómendedi. Jalpy saýda kólemi 451,5 mlrd teńgeni qurady (+2,6 mlrd). Ashyq pozıtsııa kólemi shamamen 5,3 trln teńge naryq aldyndaǵy bereshekke teń.
Qor naryǵy
KASE ındeksi aptany 0,3%-ǵa ósimmen bastap, 7166,4 tarmaqqa jetti. Bul jahandyq qor naryqtaryndaǵy «buqalardyń» basymdyǵymen baılanysty. Indekske qoldaý kórsetken — Qazatomprom (+1,5%) jáne KEGOC (+0,9%) aktsııalary. Qalǵan baǵaly qaǵazdarda álsiz ózgerister baıqaldy: -0,7%-dan +0,4%-ǵa deıin. Mundaı naryqtyq dınamıka ınvestorlardyń turaqty aqsha aǵyny jáne valıýtalyq eksporttyq túsimi bar kompanııalarǵa degen qyzyǵýshylyǵynyń artýyn kórsetedi, bul — teńgeniń álsireýi aıasynda oryndy áreket.
Munaı
Munaı baǵasy 2,4%-ǵa tómendep, barreline 67,1 dollar boldy. Bul OPEK+ uıymy munaı óndirý kólemin taǵy da kóbeıtedi degen boljamdarǵa baılanysty. Eger óndirý artsa, naryqta munaı tym kóbeıip, baǵaǵa keri áser etýi múmkin. Jeksenbige josparlanǵan kezdesýde OPEK+ elderi munaı óndirýdi táýligine keminde 137 myń barrelge kóbeıtý týraly sheshim qabyldaýy múmkin.
Táýekel aktıvteri
AQSh-tyń qor ındeksteri 0,2-0,5%-ǵa ósti, sebebi ınvestorlar úkimet jumysynyń toqtap qalý yqtımaldyǵyn elemegen tárizdi. Jasandy ıntellekt (JI) chıpter segmentiniń kóshbasshysy Nvidia baǵasy ósti, óıtkeni ótken aptadaǵy JI-ge qatysty skeptıtsızm keń naryqqa qysym jasaǵan bolatyn. Keıbir treıderler tipti Nvidia men OpenAI arasyndaǵy ınfraqurylymdyq jobany iske asyrý úshin energetıkalyq resýrstar jetkilikti me dep kúmándanǵan. Saýda sessııasy nátıjesinde Nvidia aktsııalary shamamen 2%-ǵa ósti. JI sektorynyń basqa kompanııalary da ósim kórsetti: Advanced Micro Devices — 1%-dan astam, Micron Technology — 4%-dan joǵary.
Sonymen qatar, AQSh federaldy úkimetiniń 1 qazandaǵy qarjylandyrý merzimi aıaqtalýyna baılanysty jumysynyń ýaqytsha toqtap qalý qaýpi saqtalyp otyr. Mundaı jaǵdaılar ádette naryqtarǵa aıtarlyqtaı áser etpeıdi, biraq bul joly jaǵdaı basqasha bolýy múmkin. Investorlar eńbek naryǵynyń baıaýlaýy, stagflıatsııa qaýpi jáne aktsııalardyń joǵary baǵalanýy saldarynan saqtyq tanyta bastady. Buǵan qosa, úkimet jumysynyń toqtaýy Moody’s agenttigi mamyrda tómendetken AQSh-tyń kredıttik reıtıngine taǵy bir ret áser etýi múmkin.
Qorǵanys aktıvteri
AQSh úkimetiniń jumysy toqtap qalýy múmkin degen alańdaýshylyq aıasynda táýekeli tómen aktıvterge suranys artyp otyr. Altyn baǵasy 1,7%-ǵa ósip, bir ýntsııasy 3861 dollarǵa jetti. 10 jyldyq qazynashylyq oblıgatsııalar kiristiligi 4,19%-dan 4,14%-ǵa tómendedi. Al dollar ındeksi 0,3%-ǵa tómendep, 97,9 tarmaq deńgeıinde ornyqty.
Eske sala keteıik, buǵan deıin Qazaqstan Respýblıkasy Ulttyq Bankiniń Aqsha-kredıt saıasaty komıteti bazalyq mólsherlemeni 16,5% deńgeıinde saqtaý týraly sheshim qabyldaǵanyn jazǵan edik.