Munaı alyptarymen kelisimsharttardy qaıta qaraý qandaı kezeńde

ASTANA. KAZINFORM – Energetıka mınıstri Erlan Aqkenjenov elimizdiń munaı ken oryndarynan alynatyn ónimdi bólý týraly kelisimsharttardy qaıta qaraý máselesi qandaı kezeńde turǵanyn aıtty.

- Bul baǵytta jumys júrgizilip jatyr. Olar úlken kommertsııalyq kelisimsharttar bolǵandyqtan atalǵan kelissózderdiń nátıjesin sizderge habarlaımyz, - dedi mınıstr Májilistiń jalpy otyrysynan keıin BAQ ókilderiniń saýalyna oraı.

Onyń naqtylaýynsha, Qazaqstannyń zańnamasy da, ózge de ıýrısdıktsııalardyń normalary da mundaı kelisimsharttardy qaıta qaraýdyń naqty merzimin qarastyrmaıdy. Barlyǵy da taraptardyń kelissózder barysyndaǵy ustanymyna baılanysty.

- Eger Qashaǵan jobasyn aıtar bolsaq, onda «QazMunaıGazdy» qosa alǵanda 7 qatysýshy bar. Ónimdi bólý týraly kelisimge sáıkes, barlyq 7 qatysýshy qandaı da bir ekijaqty kelisimge kelýi tıis. Bir qatysýshy bas tartqan jaǵdaıda sheshim qabyldanbaıdy. Biz soǵan tap kelip otyrmyz. Sizder protsestiń kúrdeli ekenin túsiný úshin egjeı-tegjeıin aıtyp turmyn. Siz kelip «ber» degenge bere salmaıdy. Ortaq ymyraǵa kelý qajet, - dedi Erlan Aqkenjenov.

Buǵan deıin Memleket basshysy Qasym-Jomart Toqaev Úkimet ónimdi bólý jónindegi kelisimderdi elimizge anaǵurlym tıimdi ári jańa sharttarmen uzartý úshin kelissózderdi jandandyrýy qajettigin aıtqan edi.