Munaı 5 paıyzǵa arzandady: Brent markasynyń bir barreli 90 dollardan tómen tústi
ASTANA. KAZINFORM — Baǵanyń tómendeýi AQSh prezıdenti Donald Tramp ákimshiligi Reseı munaıyna qarsy sanktsııalardy jumsartý múmkindigin qarastyryp jatqany týraly habar taraǵannan keıin bastaldy. Keshe AQSh prezıdentiniń Reseı prezıdenti Vladımır Pýtınmen telefon arqyly sóılesken edi, dep habarlaıdy DW basylymy.
Buǵan deıin álemdik naryqtaǵy usynysty arttyrý maqsatynda sanktsııalyq shekteýlerdi álsiretý múmkin ekenin AQSh qarjy mınıstri Skott Bessent te aıtqan bolatyn. Sonymen qatar AQSh Úndistanǵa teńizdegi tankerlerde turǵan reseılik munaıdy satyp alýǵa 30 kúndik ruqsat bergen.
Sonymen qatar Donald Tramp CBS telearnasyna bergen suhbatynda Iranǵa qarsy soǵys «is júzinde aıaqtalýǵa óte jaqyn» ekenin málimdedi. Onyń aıtýynsha, áskerı operatsııalar josparlanǵan kesteden áldeqaıda jyldam júrip jatyr.
Buǵan deıin Aq úıde bul soǵys bir aıdan da uzaqqa sozylýy múmkin ekeni aıtylǵan-dy.
Iraktaǵy ken orny dron shabýylynan keıin munaı óndirýdi toqtatty.
Frantsııa Taıaý Shyǵystaǵy odaqtastaryn qoldaý maqsatynda shamamen onǵa jýyq áskerı-teńiz kemesin, sonyń ishinde ushaq tasyǵysh kemeler tobyn Jerorta teńizine, Qyzyl teńizge jáne qajet bolǵan jaǵdaıda Ormýz buǵazyna jiberýdi josparlap otyr.
Al AQSh Reseı munaıyna qatysty sanktsııalardy jumsartýdy qarastyryp jatyr.