«Múmkindigimdi tolyq paıdalanbadym»: Aıdos Sultanǵalı álem chempıonaty týraly aıtty
ASTANA. KAZINFORM — Grek-rım kúresinen Qazaqstan quramasynyń ókili Aıdos Sultanǵalı Astanada ótip jatqan álem chempıonatynda jeńis tuǵyrynyń úshinshi satysyna kóterildi.
QR UOK málimetinshe, jerlesimiz jarystan keıingi áserin bólisip, jartylaı fınaldaǵy beldesýi jaıly aıtty.
- Artylǵan jaýapkershilikti tolyq sezindik. Qalaı degenmen de, óz elińde óner kórsetken soń, belgili bir deńgeıde qysym bolady. Ótken jyldaǵydaı óz múmkindigimdi tolyq paıdalandym dep aıta almaımyn. Árıne, el aldynda altyn medal jeńip alyp, barsha qazaqstandyqqa qýanysh syılaǵymyz keldi. Ókinishke qaraı, bul joly qola júldeni qanaǵat tuttyq. Degenmen bul da jaman nátıje emes. Bul meniń eresekter arasynda jeńip alǵan úshinshi qola medalim. Óz elimizde ótip jatqan álem chempıonatynyń atmosferasy erekshe. Basqa álem chempıonattarynan bir bas joǵary dep aıta alamyn. Jartylaı fınalda shabýylǵa qaraǵanda qorǵanysqa kóbirek kóńil bólip qoıǵan sııaqtymyn. Sonyń saldarynan ádettegi kúres ádisim ózgerip ketti. Bul tek meniń ǵana jetistigim emes. Janymda júrgen mamandar men bapkerlerdiń de eńbegi zor. Osy nátıjege sol kisilerdiń qoldaýy men kómeginiń arqasynda qol jetkizdim dep oılaımyn, - dedi Aıdos Sultanǵalı.
Aıdos Sultanǵalı Olımpıada júldegerin jeńip, álem chempıonatynda qola medalge ıe bolǵanyn jazǵan edik.
