Múmkindigi shekteýli balalardy úıde oqytýǵa ketken shyǵyn qalaı óteledi
ASTANA. KAZINFORM – «Múmkindigi shekteýli balalardy úıde oqytýǵa jumsalǵan shyǵyndardy óteý» memlekettik qyzmeti proaktıvti formatta qoljetimdi bolmaq. Bul týraly QR Eńbek jáne halyqty áleýmettik qorǵaý mınıstrliginen málimdedi.
Vedomstvo atalǵan shyǵyn túri boıynsha ótemaqy bala memleket tarapynan tolyq qamtamasyz etilmegen jaǵdaıda otbasynyń tabysyna qaramastan ata-ananyń birine beriletinin atap ótti.
Buǵan deıin atalǵan memlekettik qyzmetti alý úshin «Azamattarǵa arnalǵan úkimet» memlekettik korporatsııasy» KEAQ fılıalyna baryp nemese eGov portalyna ótinish jazý qajet bolatyn.
Endi mobıldi azamattar bazasynda telefon nómirin tirkegen jaǵdaıda qyzmetti 1414 nómirinen tek bir SMS-ke jaýap berý arqyly alýǵa bolady.
Memlekettik qyzmetti proaktıvti kórsetý protsesi múgedektigi bar balany úıde oqytý týraly memlekettik organdardyń aqparattyq júıelerinen málimetter kelip túsken kezde avtomatty túrde bastalady.
Kelisim alǵannan keıin júıe kórsetiletin qyzmetti alýshynyń derekteriniń memlekettik qyzmet kórsetý qaǵıdalarynyń talaptaryna sáıkestigin tekseredi. Onyń nátıjesi boıynsha tólem taǵaıyndaý nemese bas tartý týraly sheshim qabyldanady.
Taǵaıyndalǵan qarajat habarlamaǵa jaýap berý kezinde kórsetiletin qyzmetti alýshy kórsetken bank shotyna aýdarylady.
Osylaısha, proaktıvti format qazaqstandyqtarǵa úıden shyqpaı-aq jáne kóp ýaqyt jumsamaı-aq qajetti qyzmetti alýǵa múmkindik beredi. Sondaı-aq sybaılas jemqorlyq táýekelderin azaıtýǵa yqpal etedi.
