Múmkindigi shekteýli azamattarǵa arnalǵan qoljetimdi orta qaǵıdalary bekitildi

ASTANA. KAZINFORM – Astana qalalyq máslıhaty múmkindigi shekteýli azamattarǵa qoljetimdi orta qurý qaǵıdalaryn bekitti. Qujat qalalyq ınfraqurylym nysandaryn qaýipsiz ári kedergisiz paıdalaný maqsatynda ázirlengen.

Qaǵıdalardy «Astana qalasynyń Jumyspen qamtý jáne áleýmettik qorǵaý basqarmasy» basshysy Erlan Júsipov depýtattarǵa tanystyrdy. Onyń aıtýynsha, jańa talaptar múgedektigi bar azamattardyń qalalyq nysandar men áleýmettik qyzmetterge teń qoljetimdiligin qamtamasyz etýge baǵyttalǵan.

Talqylaý barysynda depýtat Baýyrjan Smaıylov keıbir turǵyn úılerde pandýstardyń ornyna ornatylǵan lıftilerdiń qolaısyz jáne qaýipti ekenin aıtty. Mysaly, Kóktal-1 turǵyn alabyndaǵy «Mırnyı dom» turǵyn úıinde osyndaı lıftter paıdalaný múmkindigi shekteýli azamattar úshin qaýip týdyrady.

– Meniń usynysym boıynsha atalǵan lıftiler pandýstarǵa aýystyryldy. Bolashaqta jańa turǵyn úı jobalarynda osyndaı sheshimderge jol berilmesin, - dedi depýtat.

Máslıhatta atap ótilgendeı, qaǵıdalar jobalaý kezeńinen bastap ınfraqurylym nysandaryn arnaıy qurylǵylarmen jabdyqtaýdy, tehnıkalyq standarttardy saqtaýdy jáne jobalaý kezinde qoljetimdilikti mindetti túrde eskerýdi kózdeıdi.

Osyǵan deıin Qazaqstanda 27 myńnan asa nysan múgedektigi bar adamdar úshin beıimdelgeni týraly jazdyq.