Múmkindikteri shekteýli balalardyń VI respýblıkalyq «Juldyzaı» shyǵarmashylyq festıvali bastaldy

Dástúrli festıvaldyń bastalýyna oraı búgin «Nur Otan» HDP-nyń Ortalyq apparatynda baspasóz máslıhaty ótti.

Uıymdastyrýshylardyń biri Gúlhan Isabaevanyń aıtýynsha, festıvaldyń maqsaty shyǵarmashyl balalardy anyqtap, talaptaryn shyńdaýǵa qoldaý kórsetý, qoǵamda beıimdelýine qolǵabys etý, múgedek balalardyń problemalaryna qoǵamnyń nazaryn aýdartý bolyp tabylady.

«Juldyzaıdyń» aǵymdaǵy jylǵy festıvaline múmkindigi shekteýli 4000-nan astam bala qatysýǵa nıet bildirgen. Osy kúnderi respýblıkanyń barlyq oblys ortalyqtarynda qazylar alqasynyń qatysýymen festıvaldiń birinshi irikteý kezeńi ótip jatyr. Balalar ónerlerin vokal, mýzykalyq aspap, horeografııa, shahmat, tań qaldyrý jáne kórkem sýret janrlary boıynsha usynýda. Búgingi kúnge deıin Almaty qalasy men Taldyqorǵan, Jambyl, Ońtústik Qazaqstan jáne Qyzylorda oblystarynan nomınattar anyqtaldy. «Juldyzaıdyń» budan arǵy baǵyty Aqtóbe, Oral, Aqtaý, Óskemen, Qostanaı, Kókshetý, Petropavl, Pavlodar jáne Qaraǵandy arqyly ótip, 21 sáýir kúni Astanada aıaqtalady.

Birinshi irikteý týrynyń nátıjesi boıynsha 250 bala Kókshetaý qalasyndaǵy «Baldáýren» ROSO-da 20 kún bolady. Osy jerde baıqaýdyń ekinshi irikteý kezeńi jáne múgedek balalar úshin sheberlik sabaqtar ótkiziledi.

Festıval aǵymdaǵy jyldyń 1 maýsymynda gala-kontsertpen aıaqtalyp, jeńimpazdar saltanatty jaǵdaıda marapattalady. Gala-kontsertte júzden júırik shyqqan 500 bala óner kórsetedi dep kútilýde.