Múmkindigi shekteýli jandarǵa jasalyp jatqan jaǵdaılar talapqa saı emes - Almaz Erjan
ASTANA. QazAqparat - «ELAMAN» áleýmettik-ınnovatsııalyq jobalar qorynyń tóraǵasy Almaz Erjan múgedekterge jaǵdaı jasaýdyń kemshin tustaryn atady, dep xabarlaıdy QazAqparat tilshisi.
«Pandýs, pandýs deımiz. Mysaly, dál qazir men ákimdikke qalaı kirdim? Bul jerde deni durys pandýs ta joq. Sol úshin ákimdikti nege jaýapqa tartpaıdy? Nege aıyppul salmaıdy? Nege ákimdikti eshkim teksermeıdi? «Nur Otan» partııasynyń bas keńsesin alaıyq, ol jaqta múgedekterge arnalǵan dáretxana joq. Ol da durys emes. Zań boıynsha múmkindigi shekteýli adamdardyń quqyǵy da shektelip otyr», - dedi A.Erjan Astanada ótken keńeste.
Atalǵan otyrysta múmkindigi shekteýli jandardyń erkin júrip-turýyna jaǵdaı jasaý máselesi talqylandy.
Onyń aıtýynsha, elordada jańa nysandar salynǵanda múgedekterdiń máselesi kóp jaǵdaıda eskerilmeıdi. Bunyń barlyǵyn birden jasaýǵa bolady. Alaıda qurylystyń jobasy talqylanǵanda múmkindigi shekteýli jandardy shaqyrmaıdy, keńes almaıdy.
«Kezinde múgedekter boıynsha keńesshiler bolady dedik. Solar qaıda? Qazaqstan boıynsha barlyq ákimdikterde múgedekter boıynsha keńesshiler bar deıdi. Biraq biz olardy kórmeımiz. Ne istep jatyr? Jaı laýazymdy tasyp júr me? Joq, álde, ákim men mınıstrdiń «bırkasy» sııaqty úndemeı otyra bere me? Óz jumysyn kórsetsin! Birge jumys isteıik», - dep atap kórsetti A.Erjan.
Foto: www.facebook.com/almazerjan
