Múmkindigi shekteýli jandardyń saılaýǵa belsendi qatysýy mańyzdy - Derd Sabo
«Múgedektigi bar adamdardyń saılaýǵa belsendi qatysýy óte mańyzdy dep bilemin. Osy baǵytta Qazaqstan qoǵamynda atqarylyp jatqan sharalar qýantyp otyr. Bul óz kezeginde jalpy qoǵamdaǵy aıtarlyqtaı aýqymdy resýrs ekenin umytpaǵan jón. Osy oraıda bilikti maman barshylyq jáne olar bizge kómektesip keledi», - dedi Derd Sabo «Múgedektigi bar adamdardyń saıası jáne qoǵamdyq ómirge qatysýlary» atty dóńgelek ústel otyrysynda.
Sonymen qatar ol bul máselede memlekettik organdardyń belsendi qatysýyna oń baǵa berdi.
«Memlekettik organdar bul adamdardy azamattyq qoǵamǵa tartýǵa talpynýda. Biz azamattyq qoǵammen birlese jumys isteýdemiz. Sáıkesinshe, osy protseske qoldaý jasaýǵa tyrysyp kelemiz», - dedi Derd Sabo.
Budan buryn habarlanǵandaı, QR Eńbek jáne halyqty áleýmettik qorǵaý mınıstrligi 2021 jylǵy 10 qańtarda ótetin Parlament Májilisi men máslıhat depýtattarynyń saılaýynda múgedektigi bar adamdar úshin qoljetimdi ortany qamtamasyz etý maqsatynda aýmaqtyq saılaý komıssııalary úshin birqatar usynym ázirledi.
QR Eńbekmıni Ortalyq saılaý komıssııasynyń nusqaýlyǵyna sáıkes múgedektigi bar adamdar úshin saılaý ýchaskeleriniń qoljetimdiligin qamtamasyz etýdi usynady. Atap aıtqanda, pandýstar, shaqyrý knopkalaryn, taktıldi plıtkalar, monıtory bar kompıýterler, qosymsha jaryqtandyrý, trafaretter jáne t. b. ornatýdy qamtamasyz etý qajet. Budan basqa, onlaın-sýrdoaýdarma nemese ymdaý tili mamandarynyń kezekshiligi usynylady. Sonymen qatar, saılaý ýchaskeleri ǵımarattyń birinshi qabatynan joǵary ornalasqan jaǵdaıda múgedektigi bar adamnyń arbasyna arnalǵan arnaıy lıft bolýy kerek.
