Múmkindigi shekteýli jandardy qoldaýǵa qansha qarajat bólinedi

NUR-SULTAN. QazAqparat – Áleýmettik qorǵaý týraly zań jobasynyń normalary memleket tarapynan bazalyq áleýmettik kepildikterdi qamtamasyz etýdiń ózekti máselelerin kórsetedi. Bul týraly búgin Májiliste zań jobasyn tanystyrý barysynda QR Eńbek jáne halyqty áleýmettik qorǵaý mınıstri Serik Shapkenov málim etti, dep habarlaıdy QazAqparat tilshisi.

«Zań jobasynyń taǵy bir negizgi jańalyqtarynyń biri - eńbek qyzmetin qaıta bastaǵan jaǵdaıda, bala bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda tólenetin áleýmettik tólem somasynyń kepildik berilgen deńgeıin (respýblıkalyq bıýdjetten bir jasqa deıingi bala kútimi boıynsha osyǵan uqsas aı saıynǵy memlekettik járdemaqy deńgeıinde) belgileý bolyp otyr», - dedi mınıstr.

Serik Shapkenov múgedek balany kútim jasaý kezeńin 18 jasqa deıin uzartýǵa toqtala kele, buryn múgedek balany kútim jasaý kezeńi 16 jasqa deıin eskerilgenin jetkizdi.

«Bul norma múgedek balalardyń jas toptarynyń ózgerýine baılanysty engiziledi. Budan basqa, ol jasyna baılanysty zeınetaqy tólemderi men bazalyq zeınetaqy taǵaıyndaý kezinde oń áserin tıgizedi. Jalpy, Zań jobasynda baıandalǵan normalar múgedekterdi áleýmettik qoldaý, ataýly áleýmettik kómek jáne zeınetaqymen qamsyzdandyrý máselelerin qosa alǵanda, memleket tarapynan bazalyq áleýmettik kepildikterdi qamtamasyz etýdiń ózekti máselelerin kórsetedi», - dedi vedomstvo basshysy.

Mınıstrdiń aıtýynsha, zań jobasyn qabyldaý bıýdjet qarajatyn qosymsha bólýdi talap etpeıdi, shyǵyn normalary 2021 – 2023 jyldarǵa bólingen qarajat – 55,4 mlrd teńge aıasynda iske asyrylatyn bolady.

Budan buryn habarlanǵandaı, búgin «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy tanystyryldy.

Zań jobasy aıasynda 2 myńnan astam balaǵa qosymsha járdemaqy berý eskerilgen.

Eske salsaq. «Halyqty jumyspen qamtý týraly» Zańǵa sáıkes jergilikti atqarýshy organdar aýyr jumystardy, eńbek jaǵdaılary zııandy, qaýipti jumystardaǵy jumys oryndaryn eseptemegende, jumys isteıtinderdiń jalpy sanynyń 2-den 4%-ǵa deıingi (keminde 50 adam) mólsherinde múgedekter úshin jumys oryndaryna kvota belgileıdi. Bıznestiń áleýmettik jaýapkershiligin kúsheıtý maqsatynda múgedektigi bar adamdardy jumyspen qamtý úshin múgedektigi bar adamdardy jumysqa ornalastyrý jónindegi kvotany oryndamaıtyn jumys berýshilerdiń arnaýly qorǵa ótemaqy tólemderin tóleýdi engizý usynylady. Bul norma 2023 jyldan bastap engiziletin bolady.