Múmkindigi shekteýli jandar Pavlodarda salynyp jatqan úılerdiń sapasyna narazy
ASTANA. QazAqpara-Pavlodarda jańadan salynyp jatqan úılerdiń esikteri múgedekterge arnalǵan arbalarǵa saı kelmeıdi, ıaǵnı kólemi tar bolyp shyqty, dep habarlaıdy pavlodarnews.kz.
Bul týraly «Múmkindigi shekteýli jandardyń ómirin ońaltý» taqyrybynda ótkizilgen dóńgelek ústel barysynda óńirlik múgedekter qoǵamynyń tóraǵasy Georgıı Chetverıkov aıtty.
«Qurylys normalary men erejelerinde 20 jyldan beri shegelenip kórsetilgen. Jýyný bólmesine kiretin esiktiń eni 80 santımetrden kem bolmaý kerek. Kóktemde Lomov, 132/1 mekenjaıy boıynsha tehnıkalyq mektebi bar úı paıdalanýǵa berildi. Ony kórýge bári keldi, biraq, ishine kirdi me, joq pa, bilmedim. Bir tanysym sol úıden páter aldy. Dárethana men jýyný bólmelerine kiretin esiktiń eni 60 sm. Al, bizdiń arbamyzdyń eni - 75 sm. Ereje bar, norma bar, biraq, nelikten sáýletshiler ony nazarǵa almaıdy. Budan bólek, basqa da úıler salynyp jatyr, munda da dál solaı. 60 sm - bul únemdeý me, qalaı?», - dep narazylyǵyn bildirdi Georgıı Chetverıkov.
Qalalyq máslıhattyń hatshysy Záýresh Muqashevanyń oıynsha, bul úıler jeńildigi bar adamdarǵa arnalǵan bolýy yqtımal, al, páter alý kezeginde múmkindigi shekteýli jandar bolmaǵandyqtan baspana solaı salynǵan.
«Bıyl biz sáýlet bóliminde jobalyq ǵımarattarda jaramsyz alty qurylys normasyn qoldanyp júrgenin anyqtadyq», - deıdi «Dostýpnyı Pavlodar» jobasynyń basshysy Aleksandra Bobkova.
«Yńǵaıly esikter osydan keıin qaıdan bolady? Bólmege kirerdegi esiktiń eni barlyq jerde birdeı bolý kerek. Olar qujattardyń qalaı ózgerip jatqanyn bilmeıdi me? Biz bes aı buryn hat jazǵan bolatynbyz, jaýaby áli kelmedi. Kezdesý sońynda mundaı sharalardy toqsan saıyn ótkizý usynyldy. Qurylys normalary men erejeri jáne salynyp jatqan úıler týraly suraq sheshimin tappaǵandyqtan, kelesi otyrysqa sáýletshiler men qurylys kompanııalarynyń basshylary shaqyrtylady.
