Múmkindigi shekteýli jandar arasyndaǵy búkilálemdik ıslam oıyndarynda qazaqstandyqtar 38 eldiń ishinen 6-oryn aldy
ALMATY. 9 jeltoqsan. QazAqparat /Erlik Erjanuly/ - Keshe Birikken Arab Ámirliginiń Shardja qalasynda ótken múmkindigi shekteýli jandar arasyndaǵy búkilálemdik ıslam oıyndaryna qatysqan qazaqstandyqtar elge oraldy.
Olar bul dúbirli dodada tuńǵysh ret baq synap otyrǵanyna qaramastan 38 eldiń arasynan jalpy komandalyq esepte 6-oryn aldy. Qazaqstandyqtar jeńil atletıka men sýda júzý sport túrleri boıynsha qatysqanyna qaramastan el qorjynyna 7 altyn, 9 kúmis, 7 qola medal saldy.
Gennadıı Onıchko jattyqtyratyn jeńil atletter arasynan almatylyq 2 sportshy júldeger bop qana qoımaı, paralımpıada oıyndarynyń normatıvterin oryndap 2012 jyly Londonda ótetin paralımpıada oıyndarynyń joldamasyn jeńip aldy. Atap aıtqanda dısk laqtyrýdan ekinshi, naıza laqtyrýdan úshinshi oryn, al ıadrony laqtyrýdan 11, 43 metrdi baǵyndyryp, paralımppıada normatıvin oryndaǵan Ravıl Mansýrbaevty BAÁ koroli marapattady. Al ekinshi joldamaǵa almatylyqtar sapynan uzyndyqqa sekirýde paralımpıada normatıvinen 32 sm. artyq nátıjege qol jetkizgen Amanat Qalqaev ıe boldy.
