Múmkindigi shekteýli oqýshylar Olımpıada oıyndarynda 7 medal jeńip aldy
ALMATY. QazAqparat - Múmkindigi shekteýli almatylyq oqýshylar Special Olympics International oıyndarynda 7 medal utyp aldy, dep habarlaıdy QazAqparat tilshisi.
Qalalyq ákimdiktiń qoǵammen baılanys qyzmeti habarlaǵandaı, dúbirli doda Birikken Arab ámirlikteriniń astanasy Abý Dabı qalasynda 8-22 naýryz aralyǵynda ótti. Sport saıysynda álemniń 190 elinen 24 sport túri boıynsha 7500 sportshy baq synady. Bul - Taıaý Shyǵys elderi tarıhyndaǵy birinshi arnaıy olımpıada. Ashylý saltanatyna qurmetti qonaq retinde shaqyrylǵan QR Tuńǵysh Prezıdenti Nursultan Nazarbaev qatysty.
Bul oıyndarda almatylyq oqýshylar 7 medalge qol jetkizdi. Atap aıtqanda, aqyl esi damymaǵan oqýshylarǵa arnalǵan №7 mektep-ınternatynyń 8-synyp oqýshysy Sergeı Býkýev jeńil atletıka boıynsha 2 qola medal aldy. Bul oıyndarda Qazaqstan quramasynan atalǵan mekteptiń 4 túlegi oınaıdy. Olar da Qazaqstan qorjynyna 2 altyn, 2 kúmis medal saldy.
Almaty túzetý mektep ınternattarynyń oqýshylary bul jarysqa Qazaqstan Special Olympics quramasynda qatysyp jatyr. 2009 jyldan beri olar 7 júlde: 1 altyn, 1 kúmis, 5 qola alǵan.
«Sporttyq sharalarǵa belsene qatysatyn balalar dene bitimin jaqsy ustaı bastaıdy. Rýhanı, áleýmettik jaǵynan da damı túsedi. Arnaıy olımpıada oıyndarynyń anty da soǵan sáıkes: «Maǵan jeńýge ruqsat etińizder, degenmen jeńe almaı qalsam, barynsha batyldyq tanytty dep esepteńizder!», - dedi Special Olympics Qazaqstan uıymdastyrýshylary.
Bul oıyndar - aqyl-oıynyń damýynda kinárat bar adamdardyń sportpen aınalysýyna múmkindik beretin álemdegi eń úlken saıys. Ony 1968 jyly ıÝnıs Kennedı Shraıver men onyń jubaıy Sardjent Shraıver ashqan. Qazaqstanda Special Olympics 1990 jyldan beri ótkizilip keledi.
