Múmkindigi shekteýli kásipkerler syılyqtar aldy
QYZYLORDA. QazAqparat-Jańa jyl qarsańynda Qyzylorda oblysynda múmkindigi shekteýli 8 bastaýysh kásipkerge demeýshilik kómek kórsetildi, dep habarlady «QazAqparat» HAA tilshisi «Damý» qoryna silteme jasap.
Demeýshilik kómek «Damý» qorynyń Kásipkerlerge qyzmet kórsetý ortalyǵynda tabystaldy. Múmkindigi shekteýli jandarǵa bıznesmen Baýyrjan Mahmýtov, «Aı-Dıas» JShS dırektory Aınur Bermaǵanbetova, JK «Sherhan ı K» jáne JK «AzııaEkspress» kompanııalary qoldaý kórsetti.
Baıqońyr qalasynyń turǵyny Aısholpan Qaıdaýlova 4 jyl buryn birinshi toptaǵy múgedek atanǵan. Alaıda múgedektik arbasyna tańylǵanyna qaramastan jas qyz úıinen shaǵyn bıznes asha aldy. Aısholpan tapsyrys boıynsha merekeler men saltanatty keshterge arnalǵan túrli astar men tátti taǵamdar pisirýde. Kásipkerdiń sózinshe, tapsyryspen úıden túrli taǵamdar daıyndaý bıznesi múmkindigi shekteýli azamattarǵa óte tıimdi jáne túsetin tabys ta jaman emes. Kásipkerligin keńeıtý maqsatynda Aısholpan Qaıdaýlova «Damý-Kómek» baǵdarlamasymen járdem alý úshin «Damý» qoryna júgindi. Onyń jobasyn tabysty bıznesvýmen Aınur Bermaǵanbetova qoldap, kásipkerge elektrli jáne mıkrotolqyndy peshti syıǵa tartty.
Saǵatbek Sııýov ekinshi toptaǵy múgedek. 25 jastaǵy jigit 2013 jyly kólik apatyna túskennen keıin múgedek arbasyna tańylǵan. Ýnıversıtette baǵdarlamashy mamandyǵyn ıgergen Saǵatbek IT-baǵytynda bıznes bastaýǵa nıet bildirip otyr.
«Úıdiń tuńǵysh uly retinde artymnan ergen kishi inim men qaryndasyma únemi qoldaý kórsetýim qajet. Mamandyq boıynsha jumys tabylmaǵandyqtan, óz bıznesimdi úıden kompıýterlik qyzmet kórsetýden bastaýǵa sheshim qabyldadym. Bolashaqta ózimniń IT-kompanııamdy ashamyn degen maqsatym da joq emes. Men «Damý» qoryna kómek alý jóninde ótinish bergenmin, al búgin maǵan noýtbýk syılap otyr. Osy oraıda atalmysh Qorǵa jáne bıznesmen Baýyrjan Mahmýtovqa kórsetken kómekteri úshin alǵys bildiremin», - deıdi Saǵatbek.
Sońǵy úlgidegi tigin mashınasy birinshi top múgedegi Nesibeli Múslimovaǵa tabystaldy. 25 jyldyq tájirıbesi bar mamannyń www.damu-komek.kz saıtynda qaldyrǵan ótinishine JK «AzııaEskpress» kompanııasy jaýap qatty. Nesibeli Múslimova óziniń múmkindiginiń shekteýli bolǵanyna qaramastan, qolónermen aınalysyp aqsha tabýdy úırengen. Jańa tigin mashınasyna ıe bolǵan kásipkerdiń endigi jospary úıden túrli ónimder men kıim-keshekterge tapsyrystar qabyldaý.
Sondaı-aq, demeýshilik kómekke Janat Qaraqojaeva (I toptaǵy múgedek), Nazerke Іzmahanova (III toptaǵy múgedek), Jansaıa Dúısemanova (III toptaǵy múgedek), Aızat Absadyqova (II toptaǵy múgedek) jáne Elmıra Aqmyrzaevalar ıe boldy.
Jyl basynan «Damý-Kómek» baǵdarlamasy aıasynda múmkindigi shekteýli 30 bastaýysh kásipkerge qoldaý kórsetildi.
