Múmkindigi shekteýli balany tárbıelep otyrǵan qamqorshy analarǵa jańa járdemaqy belgilenedi - konferentsııa
ASTANA. Jeltoqsannyń 11-i. QazAqparat /Aıdar Ospanalıev/ - Múmkindigi shekteýli balany tárbıelep otyrǵan qamqorshy analarǵa 15 myń teńge kóleminde jańa járdemaqy belgilenetin bolady.
Al 2010 jyldan bastap, «Altyn alqa» 7 jáne odan da kóp bala týǵan analarǵa beriledi. Sondaı-aq «Kúmis alqa» 6 bala týǵan analarǵa beriledi. Bul týraly búgin Astanada «Áıelderdiń qoǵamdaǵy saıası múmkindikteri - genderlik demokratııanyń ustanymdary, problemalar men perspektıva» atty taqyrypta ótken konferentsııa barysynda Májilis depýtaty Aıtkúl Samaqova málim etti, dep habarlaıdy QazAqparat.
Onyń sózine qaraǵanda, «Altyn alqa» buryndary 10 balasy bar anaǵa berilse, «Kúmis alqany» alý úshin keminde 8 balań bolýy qajet bolatyn. «Sondaı-aq atalmysh alqalar men «Batyr ana» ataqtarynyń, 1-shi jáne 2-shi dárejeli «Ana dańqy» ordenderiniń ıegerlerine kelesi jyldan bastap arnaıy memlekettik járdemaqynyń kólemi 6 aılyq eń tómengi eseptik kórsetkish kóleminde, ıaǵnı 9 myń teńge beriletin bolady», dedi A.Samaqova.
