Múmkindigi shekteýli balalary bar ata-analarǵa psıhologııalyq qoldaý kórsetiledi
ASTANA. QazAqparat -Astana qalasynda 18-20 jeltoqsan kúnderi elimizdiń 5 aımaǵynan kelgen psıhologtar «Múmkindigi shekteýli balalardyń ata-analarymen jumys ádisteri» atty semınar ótkizedi. Jobany «Dara» qaıyrymdylyq qory psıhologııalyq-pedagogıkalyq túzetý kabınetteriniń mamandaryna arnap uıymdastyryp otyr, dep habarlady qordyń baspasóz qyzmetinen.
Qordyń uıytqy bolýymen buǵan deıin Almaty, Astana, Qaraǵandy qalalaryndaǵy 4 túzetý ortalyǵynda ata-analar klýby qurylyp, múgedek balalary bar otbasylarǵa psıhologııalyq jáne aqparatttyq qoldaý kórsetildi. Ata-analardyń aıtýynsha, olar mundaı qoldaýǵa asa muqtaj.
-Mamandardyń keńesiniń arqasynda biz ózimiz úshin eń basty máseleni túsindik - bizdiń balamyzdyń jaǵdaıynda adam uıalatyn nemese shoshıtyndaı eshteńe joq, ol tek qana basqalardan erekshe, kópshilikke uqsamaıdy. Mamandar bizge balamyzben qalaı durys qarym-qatynas qurýdy, ýaqytymyzdy onyń damýy úshin tıimdi, ári qyzyq etip uıymdastyrýdy úıretti,-deıdi qaraǵandylyq Marına Kabalova.
Úsh kúndik semınar psıholog-mamandardyń biliktiligin arttyrý arqyly ata-analarǵa kórsetiletin qyzmet sapasyn kóterýdi kózdeıdi. Semınardy belgili psıholog, Eýrazııa tájirıbelik psıhologııa jáne psıhoterapııa ıntsıtýtynyń mamany Lıýdmıla Kýlıkova júrgizedi.
