Múmkindigi shekteýli azamattar úshin kedergiler meılinshe joıylady - Parlament
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine múgedekterdiń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy eki oqylymda talqylanyp, qabyldandy. Endi Parlament qabyldaǵan Zań Memleket basshysynyń qol qoıýyna joldanady.
Atalǵan qujat QR Prezıdentiniń «Múgedekterdiń quqyqtary týraly konventsııaǵa jáne Múgedekterdiń quqyqtary týraly konventsııaǵa Fakýltatıvtik hattamaǵa qol qoıý týraly» Jarlyǵyn iske asyrýǵa baǵyttalady. Osyǵan baılanysty zańnamada múgedekterge Konstıtýtsııada, Qazaqstan qatysýshysy bolyp tabylatyn halyqaralyq sharttarda bekitilgen azamattyq, saıası, áleýmettik, ekonomıkalyq, mádenı jáne basqa da quqyqtar men bostandyqtardy iske asyrýdy qamtamasyz etedi. Múmkindigi shekteýli jandardyń basqa da azamattarmen teń múmkindikteri qamtylady.
Atap aıtqanda, múmkindigi shekteýli azamattardyń áleýmettik qorǵaý júıesin jetildirý boıynsha birneshe baǵyttardy qamtıdy. Onyń ishinde kólik ınfraqurylymynyń qoljetimdiligin arttyrý, áleýmettik sala qyzmetterin jaqsartý, aqparat pen turǵyn úıge qoljetimdiligin arttyrý, sonymen birge quqyqtyq kómekti jetildirý qamtamasyz etiledi. Máselen, múmkindigi shekteýli azamattar úshin kólik ınfraqurylymynyń qoljetimdiligin arttyrý maqsatynda vokzaldar men áýejaılarda kedergisiz ortalyq qurý, temirjol quramdaryn múgedekter úshin qoljetimdi vagondarmen jabdyqtaý qarastyrylady. Al múmkindigi shekteýli azamattardyń turǵyn úıge qoljetimdiligin qamtamasyz etý maqsatynda tirek-qımyl apparaty zaqymdanǵan múgedekterge beriletin baspana páteriniń ekinshi qabattan joǵary bolmaýy, basqa baspana bermesten úshinshi top múgedekterin qyzmettik turǵyn úıden shyǵarýǵa jol bermeý qarastyrylyp otyr.
Zańdy qabyldaý múgedekterdi áleýmettik qorǵaý júıesin jetildirip, olardy ońaltý salasyndaǵy qyzmetterin kórsetýdiń tıimdiligin arttyrady. Múmkindigi shekteýli azamattardyń kórsetiletin qyzmetterge degen qajettiligi eskerile otyryp, olarda týyndaıtyn kedergiler men tosqaýyldardy joıýǵa múmkindik beredi.
