Múmkindigi shekteýli adamdarǵa qyzmet kórsetý tártibi ózgeredi - mınıstrlik

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi múgedektigi bar adamdarǵa jeke kómekshiler usynatyn qyzmetterdi jetkizýshini óz betinshe tańdaý múmkindigin berý máselesin qarastyrýda, dep habarlaıdy QazAqparat.

Qoldanystaǵy erejelerge sáıkes, jeke kómekshilerdiń qyzmetteri ÚEU arqyly nemese jeke kómekshiler men jumyspen qamtýdyń óńirlik basqarmalary arasynda tikeleı kelisim jasasý arqyly kórsetilýi múmkin. Elimizdiń kóptegen aımaqtarynda bul qyzmetter uıymdastyrýshylyq jáne aqparattyq fýnktsııalardy júzege asyratyn ÚEU arqyly kórsetiledi. Alaıda, jekelegen ÚEU jumysynyń sapasy múgedektigi bar adamdar tarapynan synǵa túsedi.

Olardyń aıtýynsha, ÚEU kelisimsharttyq mindettemelerdi adal oryndamaıdy, ákimshilik shyǵyndarǵa qarajattyń 10%-yn ustap qalady jáne qyzmet kórsetý tizbegindegi qosymsha býyn bolyp otyr.

«Qazirgi ýaqytta oblys ákimdikteri qyzmet alýshylarǵa olar úshin qaı ádis qolaıly ekenin anyqtaý maqsatynda saýalnama júrgizýde. Aldyn ala málimetter boıynsha, múgedektigi bar adamdardyń kópshiligi jumyspen qamtý bólimderimen tikeleı jumys isteý týraly usynysty qoldaıdy. Sondyqtan biz jeke kómekshilerge qyzmet kórsetýdiń qoldanystaǵy erejelerine túzetýler engizýdi josparlap otyrmyz jáne 2020 jyldyń qańtarynan bastap múgedektigi bar adamarǵa osy qyzmetterdi alý tásilin tańdaýǵa múmkindik beremiz», - dedi QR Eńbek jáne halyqty áleýmettik qorǵaý vıtse-mınıstri Erlan Áýkenov.

Aıta ketý kerek, Qazaqstanda birinshi toptaǵy múgedekterdiń sany 24 myńnan asady, olar jeke kómekshilerdiń qyzmetin alady. Bul qyzmetter múgedekterdiń quqyqtary týraly konventsııaǵa sáıkes múgedektigi bar adamdardy qoǵamǵa qosý jáne ıntegratsııalaý maqsatynda usynylady. Jeke kómekshilerdiń qyzmetterine múgedektigi bar adamdy jumysqa, bilim berý mekemelerine, memlekettik, áleýmettik, medıtsınalyq jáne basqa nysandarǵa barǵan kezde alyp júrý kiredi.