Múmkindigi shekteýli 85 astanalyq sport klýbyna qabyldandy
ASTANA. 23 qańtar. QazAqparat - Qańtar aıynda múmkindigi shekteýli 85 astanalyq azamat «Qaısar» sport klýbynyń saýyqtyrý toptaryna qabyldandy.
Budan bylaı, «Balam-aı» qoǵamynyń, Qazaq zaǵıptar qoǵamynyń astanalyq fılıalynyń, QR Múgedekter konfederatsııasy janyndaǵy beıimdeý ortalyǵynyń kózderi nashar kóretin jáne mıdyń sal aýrýyna shaldyqqan SPODA múgedekteri tájirıbeli nusqaýshylar men jattyqtyrýshylardyń basshylyǵymen júzý sektsııalaryna barady. Bul týraly Astana qalasynyń resmı saıty Týrızm, dene shynyqtyrý jáne sport basqarmasynyń baspasóz qyzmetine silteme jasap habarlady.
«Biz únemi múmkindiginshe kóp adamdy sportqa baýlýǵa tyrysyp kelemiz. Ádette saýyqtyrý toptaryna keletinder sportpen kásibı túrde shuǵyldanýdy jalǵastyryp, negizgi topqa ótedi. Biz úshin munyń ózi úlken jetistik. Bizdiń sportshylarymyzdy únemi qoldap otyrǵany úshin qala ákimdigine alǵys bildiremiz», - dedi «Qaısar» SK dırektory Allabergen Aldońǵarov.
Ótken jyly on jyldyǵyn atap ótken «Qaısar» sport klýby elimizdegi múgedekterge arnalǵan alǵashqy sport klýby bolatyn. Búgingi tańda ol múmkindigi shekteýli jandardy áleýmettik beıimdeýge kómektesetin senimdi mekeme bolyp otyr. Klýb jańa sportshylardy qalyptastyrýǵa belsendi atsalysyp keledi. Qazirgi kezde sporttyq-saýyqtyrý toptarynda sporttyń 10 túri boıynsha 320 sportshy jattyǵady, olardy biliktiligi joǵary 14 maman jattyqtyrady. «Qaısardaǵy» sportshylardyń basym bóligi júzýmen, stol tennısimen jáne fýtbolmen aınalysady. Ótken jyly besikarbada bıleý boıynsha top ashylǵan bolatyn. Ashylǵannan keıin kóp ótpeı-aq, el chempıonatyna qatysqan astanalyq bıshiler júldeli oryndarǵa ilikti.
