Mýmbaıdaǵy nóser: 16 adamdy qulaǵan qabyrǵa basyp qaldy
NUR-SULTAN. QazAqparat -Úndistannyń Mýmbaı qalasy men oǵan kórshiles aýdandarda tolassyz jaýǵan nóser saldarynan seısenbige qaraǵan túnde kem degende 16 adam qaza tapty. Bul týraly NDTV telearnasy habarlady.
Onyq aqparatyna qaraǵanda, Mýmbaıdyń Malad Ist aýdanynyń ózinde záýlim úıdiń qabyrǵasy basyp qalyp, 13 adam qaza tapqan, taǵy tórteýi zardap shekken. Qutqarýshylardyń aıtýynsha, taǵy birneshe adam úıindilerdiń astynda qalýy múmkin.
Kórshi Thana qalasynda mekteptiń qabyrǵasy qulap, úsh adamdy mert qylǵan, sonyń bireýi - kishkentaı bala.
Óńirde mýsson jaýyny jeksenbiden beri tolastamaı tur. Kósheler ózenge aınalyp, kólik qozǵalysyn múlde toqtatyp tastaǵan. Mýmbaı bıligi seısenbi kúni barlyq mektepterdi jaýyp, mekemeler úshin demalys kúni dep jarııalady.
Sınoptıkterdiń aıtýynsha, nóser ázirge tolastamaq emes.
