Mýmbaı, Tokıo, Sıngapýr, Shanhaı jáne Nıý-Iork qalalaryna avıareıster ashylady

2024-2025 jyldary Mýmbaı, Tokıo, Sıngapýr, Shanhaı jáne Nıý-Iork qalalaryna avıareıster ashylady. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.

«Іshki avıatasymaldaýdy 5 qazaqstandyq tasymaldaýshy júzege asyrady. Aptasyna 644 reıs oryndalady, bul ótken jylmen salystyrǵanda 7 paıyzǵa artyq. Ushý qoljetimdiligin qamtamasyz etý jáne ishki týrızmdi damytý maqsatynda avıamarshrýttardy sýbsıdııalaý mehanızmderi qoldanylady. Bıyl halyqty qoljetimdi áýe tasymaldarymen qamtamasyz etý úshin 9 oblysta 23 avıamarshrýtty sýbsıdııalaýǵa respýblıkalyq bıýdjetten 6 mlrd 900 mln teńge bólindi. Kelesi jyly bul qarajat taǵy da ulǵaıyp, 8 mlrd 200 mln teńgege jetip otyr», - dedi ol.

Mınıstrdiń dereginshe, qazirgi ýaqytta 28 elmen 110 baǵytta reıster oryndalady. Sońǵy eki jylda Mılan, Doha, Abý-Dabı, El-Kýveıt jáne basqa da qalalarǵa 32 halyqaralyq avıamarshrýt ashyldy.

«Aldaǵy 2024-2025 jyldary Mýmbaı, Tokıo, Sıngapýr, Shanhaı jáne Nıý-Iork qalalaryna reıster ashylatyn bolady. Osy jyly Qazaqstanǵa ushýǵa 6 sheteldik avıakompanııaǵa ruqsat berildi. Oǵan qosa, «ashyq aspan» rejımine túzetýler engizilip, «áýe erkindiginiń» besinshi dárejesin paıdalanýǵa barlyq shekteýler alynyp tastaldy. Nátıjesinde, 2024 jylǵy 14 naýryzdan bastap Azııalyq iri loý-kost «Air Asia» kompanııasy Almaty – Kýala-Lýmpýr baǵytynda reısterdi oryndaýǵa kirisedi jáne «ashyq aspan» rejımin qoldana otyryp, Almatydan ári qaraı Djıdda qalasyna reısterdi oryndaıtyn bolady. Bunyń barlyǵy naryqta básekelestikti kúsheıtedi jáne bıletterdiń qoljetilimdigin arttyrady», - dedi Marat Qarabaev.