Mýmbaı qalasynda jarylys boldy: 21 adam qaza tapty
ASTANA. 14 shilde. QazAqparat - Úndistannyń Mýmbaı qalasynda qatarynan úsh jarylys boldy, dep habarlaıdy Bı-Bı-Sı.
21 adam qaza tapty, 113 adam jaraqat alǵan, dep habarlady Maharashtra shtatynyń basshysy Prıthvıradj Chavan. Ol úsh jarylysty «úılestirilgen lańkestik shabýyl» dep atady.
Jarylys keshki qarbalas kezinde, jergilikti ýaqyt boıynsha shamamen saǵat 19.00-de Zeverı Bazar, Opera Haýs jáne Dadar aýdandarynda bolǵan. Polıtsııa bergen derekkózge silteme jasala otyryp, qoldan jasalǵan jarylǵysh zattar jarylǵan degen aqparat taraýda.
2008 jyly Mýmbaı qalasynda 174 adam, sonyń ishinde 28 shetel azamaty kóz jumǵan úlken jarylys jasalǵan edi. Ol jyly lańkesterdiń shabýyl jasaǵan oryndary retinde temirjol vokzaly, eki qymbat qonaqúı men eýropalyq mádenıet ortalyǵy tańdalyp alynǵan.
Delıdegi Bı-Bı-Sı tilshisi Soýtık Bısvastyń habarlaýynsha, úsh jarylys bolǵan Mýmbaıdyń úsh aýdany adamdar eń kóp jınalatyn oryndar bolyp tabylady.
Zaverı Bazar - zergerlik dúkenderimen belgili bazar aýdany. Qalanyń bul aýdany buryn da shabýylǵa ushyraǵan. 1993 jyly bul jerde jarylys jasalyp, 17 adam qaza tapqan, 57 adam jaraqat alǵan.
Bul aýdanǵa jaqyn jerde ornalasqan Opera Haýs aýdany - iskerlik aýdan, al Dadar aýdanynyń ortalyǵynda Mýmbaıdyń qala mańyndaǵy baǵyttarǵa qyzmet kórsetetin vokzaly ornalasqan.
