Mýmbaıdaǵy órt: 10 adam otqa oranǵan ǵımarat ishinde qalyp qoıǵan
ASTANA. QazAqparat - Sársenbi kúni tańerteń Úndistannyń ekonomıkalyq astanasy - Mýmbaı qalasyndaǵy kópqabatty úılerdiń birinen órt shyqty, dep habarlaıdy RIA Novostı qala polıtsııasynyń ókiline silteme jasap.
Agenttikke suhbat berýshiniń aıtýynsha, Parel aýdanyndaǵy bıik turǵyn úı ǵımaratynyń 12-inshi qabaty órtke oranǵan. Qazirgi tańda oqıǵa ornynda 14 órt sóndirý kóligi jalynmen arpalysyp jatyr. Kýágerlerdiń áleýmettik jelilerde jarııalaǵan sýretterinen kók tútin basqan ǵımarattyń ústinen tikushaqtar aınala ushyp júrgeni kórinedi.
«Biz ǵımarattan syrtqa ózdiginen jete almaı, tóbesine shyǵyp ketken birneshe adamdy krannyń kómegimen qutqara aldyq. Bizdiń baǵamdaýymyzsha, úıde áli 10 adam bar. Olar baspaldaqtardyń arasynda qysylyp qalǵan bolýy kerek. Aman-esen shyǵaryp alý úshin bar kúshimizdi salyp jatyrmyz», - dedi quqyqqorǵaý organdarynyń ókili.
Onyń aıtýynsha, qaza tapqandar jaıynda maǵlumattar joq. Órttiń shyǵý sebepteri ázirge belgisiz.
