Múliktik kiris salyǵy ustalatyn merzim uzartyldy
ASTANA. KAZINFORM – Jyljymaıtyn múlikti satyp alǵan soń, eki jyl ishinde satqan azamattar múliktik kiris salyǵyn tóleıdi. Jańa erejeni QR QM Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaın Kóptileýuly málimdedi.
Buǵan deıin múliktik kiris salyǵyn ustaý ýaqyty bir jyl bolatyn. Endi bul merzim eki jylǵa uzartyldy. Kópshilikke túsinikti bolý úshin Kóptileýuly mysal keltirdi.
– Máselen, páterdi 2026 jyldyń 16 aqpanynda 10 mıllıon teńgege satyp aldyńyz delik. Al 2028 jyldyń 16 aqpanyna deıin, ıaǵnı eki jyl ishinde 15 mıllıonǵa sattyńyz dep eseptelik. Demek, 5 mıllıon teńge tabys taptyńyz. Osy úshin kiristiń 10 paıyzy salyq retinde ustalady, – dedi sarapshy.
Sondaı-aq ol jańa norma 2026 jyldyń 1 qańtarynan bastap kúshine engenin atap ótti. Al 2025 jyldyń 31 jeltoqsanyna deıin jyljymaıtyn múlik alsańyz, onda burynǵy erejege iligesiz: bir jyl ishinde satsańyz ǵana, múliktik kiris salyǵy alynady.
E. Kóptileýuly jyljymaıtyn múlikti syıǵa ne muraǵa alǵan jaǵdaıda baǵalaý kompanııalaryna baǵalaý jumystaryn júrgizdirýge keńes berdi. Óıtkeni, naryqqa saı baǵalatpasańyz, bastapqy quny 0 teńge bolyp esepteledi. Eki jyl ishinde, aıtalyq, 10 mıllıon teńgege satsańyz, 10 mıllıon teńge tabys tapqan bolyp sanalasyz da, sonyń 10 paıyzy salyq retinde shegeriledi.
– Jyljymaıtyn múlikti syıǵa ne muraǵa alǵanda, qunyn baǵalatyp, 10 mıllıon teńge dep belgilendi delik. Eki jyl ishinde 10 mıllıonǵa satsańyz, onda eshqandaı kiris joq. Demek, salyq ta alynbaıdy. Al, aıtalyq, 12 mıllıonǵa satsańyz, onda tabys 2 mıllıon teńge. Sol 2 mıllıon teńgeden 10 paıyz salyq ustalady. Sondyqtan syıǵa ne muraǵa alynǵan jyljymaıtyn múlikti basynda birden baǵalatyp alý asa mańyzdy. Olaı bolmaǵan jaǵdaıda memlekettik tirkeýshi organdardaǵy bastapqy quny esepke alynady, – dep túsindirdi maman.
Degenmen, bul normalar el ishindegi jyljymaıtyn múlikke qatysty. Al Qazaqstan azamattary shetelderden jyljymaıtyn múlik alsa, onda múliktik kiris salyǵynyń merzimi joq. Máselen, bıyl satyp alyp, 10 jyldan keıin satsa da, túsken tabystan salyq tóleıdi.
Aıta keteıik, buǵan deıin Jańa Salyq kodeksi boıynsha tirkelý, esep berý jáne tóleý tártibi qalaı ózgeretini jóninde jazǵanbyz.