Múlki sý astynda qalǵan semeılikterden ótinish qabyldaý bastaldy
SEMEI. QazAqparat - Semeı qalasynda tabıǵı sıpattaǵy tótenshe jaǵdaı saldarynan zardap shekken azamattardyń múlkin qalpyna keltirýge baılanysty ótinishterdi qabyldaý bastaldy, dep habarlaıdy QazAqparat.
Turǵyndardyń ótinishterin qabyldaý 3 aýdanda qurylǵan shtabta júrgizillýde. Atap aıtqanda, Bobrovka saıajaıy - № 44 mektep, Prıstan aýdany - №18 mektep, Mırnyı kenti - №2 mektepte.
Sonymen qatar, qazir sý tasqynynan zardap shekken Mırnyı kenti, Bobrovka saıajaıy men Prıstan aýdanynyń turǵyndaryna «Nur Otan» partııasynyń fılıalyna jınalǵan azyq-túlik taratylyp jatyr.
Qazirgi kezde baspanalaryna oralǵan turǵyndar kómir, aǵashpen qamtamasyz etilýde. Búgingi kúnge deıin 40 tonna qatty otyn taratylǵan. Al №№ 2,18, 29,44,39 mektepter osy aýdandardaǵy oqýshylardyń ata-analaryna qajetti kıim-keshek pen oqý quraldaryn beretin boldy.
«Kesheden beri turǵyndarǵa kómir, tamaq, kıim-keshek jetkizilip jatyr. Barlyq jaǵynan qoldaý kórsetilýde. Búginnen bastap múlkin qalpyna keltirýge baılanysty ótinishterdi qabyldaý bastaldy. Qazir arnaıy komıssııa jumys júrgizýde. Barlyǵyn eseptep bolǵan soń arnaıy kómek beriledi»,- dedi qalalyq Azamattyq qorǵanys jedel shtaby aqparattyq qyzmetiniń ókili Meıirjan Amangeldıev.
Sondaı-aq, Túıemoınaq aralyndaǵy bıologııalyq ortalyqta jáne Prıstan aýdanyn apattan keıin úıilip qalǵan qoqys qaldyqtarynan tazalaý jumystary júrgiziledi. Bul jumys joǵary oqý oryndar men kolledj stýdentteriniń kómegimen júrgiziledi.
