Múlki órtengen baraholka saýdagerleri sot sheshimine tańdanyp otyr
ALMATY. QazAqparat - Búgin Almatyda Jetisý aýdandyq sotynda baraholkanyń órtenýi boıynsha úkim shyǵaryldy.
Sot sheshimine sáıkes múlki órtengen saýdagerlerdiń shyǵynyn qaıtarý máselesi endi jeke óndiristik is boıynsha qaralady.
«Sýdıa sheshim shyǵarar kezde saýdagerlerdiń taýar qujattarynyń qytaı tilinde ekendigin eskerdi. Sondyqtan osyndaı sheshim shyǵardy. Olar 15 kúnniń ishinde úkimdi qaıta qaraýǵa shaǵym túsirýge quqyly», - dedi qalalyq sottyń baspasóz hatshysy Qýandyq Eshimet.
Al, sotqa aryzdanǵan saýdagerler bolsa bul sheshimmen kelispeıtinderin aıtty.
«Biz qujattyń bárin qazaqshaǵa aýdaryp ákelgen bolatynbyz. Sot nege mundaı sheshim qabyldaǵany túsiniksiz. Men óz basym kúıik shalǵan múlkimniń shyǵyny qaıtarylatynyna senbeımin», - dedi saýdager Pazena Abdıkadırova.
Esterińizge sala keteıik, byltyr tilsiz jaý «Qulager» bazarynda ornalasqan 294 qoımany sharpyǵan bolatyn.
Jalpy alǵanda, órt saldarynan memleketke 12 mln. teńge, al jeke kásipkerlerge 290 mln. teńge kóleminde zalal keltirildi.
