Múlik salyǵyn 1 qazanǵa deıin tólemegenderge qandaı jaza bar

Astana qalasy memlekettik kirister departamenti óndiristik emes tólemderi basqarmasynyń basshysy Erlan Bákirov óńirlik kommýnıkatsııalar qyzmetinde ótken brıfıngide múlik salyǵyn tóleý merzimi aıaqtalýǵa jaqyn qalǵanyn eskertti, dep habarlaıdy QazAqparat tilshisi.

1 qazanda jeke tulǵalardyń 2022 jyldyń múlik salyǵyn tóleý merzimi aıaqtalady. Osyǵan baılanysty ótken brıfıngide Erlan Bákirov Astana boıynsha 424 myń jeke tulǵaǵa 2022 jyldyń múlik salyǵy eseptelgenin aıtty. Jalpy soma – 3,7 mlrd teńge.

«Degenmen, búgingi tańda 189 myń adam tıisti salyqty tólemegen. Bul - jalpy somanyń 1,3 mlrd teńgesi degen sóz», - dedi basqarma basshysy.

Departament ókili salyqty keshiktirgen azamattarǵa qandaı shara qoldanylatynyn túsindirdi.

«2 qazannan bastap salyq boryshy bar adamdarǵa qalyptasqan salyq qaryzy týraly habarlama joldanady. Borysh somasy 1 aılyq eseptik kórsetkishten assa (3450 teńge – red.), habarlama tabystalǵan kúnnen 30 jumys kúni ótkende boryshty májbúrlep óndirip alý týraly salyq buıryǵy toltyrylady», - dedi Erlan Bákirov.

Sondaı-aq, ol kólik salyǵyn tólemegenderdi beınekamera arqyly anyqtaý júrip jatqanyn eskertti. Aıta ketý kerek, jyldyq kólik salyǵy keler jyldyń sáýirine deıin turǵylyqty mekenjaıy boıynsha tólenip otyrýy kerek.

«12 qyrkúıektegi jaǵdaı boıynsha kólik quraldarynyń salyǵy boıynsha qalyptasqan boryshtyń jalpy somasy 2,1 mlrd teńge bolǵan. Salyq boryshy bar azamattar sany – 27 myń. Jeke tulǵalardan kólik salyǵyn óndirip alý úshin Astana qalasy polıtsııa departamentiniń jedel basqarý ortalyǵyna «Qorǵaý» jáne «Sergek» júıesine jalpy salyq qarazy 2 mlrd teńge bolatyn 4248 kóliktiń deregi engizildi. Arnaıy júrgizilgen reıd kezinde 103 mln teńgeniń salyǵy tólenbegen 1010 kólik anyqtalyp, 99 mln teńgesi óndirilgen. Al moınynda 42 mln teńgeniń salyq boryshy bar 33 avtokólik aıyp turaǵyna qoıyldy», - dedi basqarma basshysy.