Múlik ıeleri birlestikteri korporatıvtik tabys salyǵynan bosatylmaıdy — Úkimet basshysy
ASTANA. KAZINFORM — Premer-mınıstr Oljas Bektenov Quryltaı depýtattarynyń múlik ıeleri birlestikterin korporatıvtik tabys salyǵynan bosatý usynysyna jaýap berdi.
— Qoldanystaǵy salyq zańnamasy aıasynda kommertsııalyq emes uıymdar sanalatyn múlik ıeleriniń birlestikteri men páter ıeleri kooperatıvteri úshin salyq salýdyń arnaıy tártibi qarastyrylǵan. Osyǵan baılanysty olardy korporatıvtik tabys salyǵynan bólek bosatý usynysy qoldaý tappaıdy, — dedi Úkimet basshysy.
Degenmen, Premer-mınıstrdiń atap ótýinshe, bul máseleni Salyq kodeksine ózgerister engizbeı-aq, turǵyn úı qatynastary týraly zańnamada MIB pen PIK-tiń qaıtalama shıkizatty ótkizýden túsetin qarajatynyń quqyqtyq mártebesi men maqsatty paıdalanylýyn aıqyndaý arqyly retteýge bolady.
— Eger MIB nemese PIK qaıtalama shıkizatty ótkizýden túsken qarajattyń tolyq kólemin kondomınıým nysanyn basqarýǵa jáne ony kútip-ustaýǵa jumsasa, salyq salynatyn tabys qalyptaspaıdy jáne korporatıvtik tabys salyǵyn tóleý mindettemesi týyndamaıdy, — dedi Oljas Bektenov.
Buǵan deın ol Quryltaı depýtattarynyń «Taza úı — Taza el» jobasyna ulttyq mártebe berý usynysyna jaýap bergen edi.
