Múlikti tárkileý bóliminde 3 jyl boıy memleket kirisine ótkizilmegen 30-dan astam zergerlik buıymdar men aqshalaı qarajat tabyldy

Bul týraly Astana qalalyq prokýratýrasynyń baspasóz qyzmetinen habarlandy.

Atap aıtqanda, prokýratýralyq tekserýler barysynda sot oryndaýshylarynyń boryshker múlkin baǵalaý jáne ótkizý, sondaı-aq múlikti tárkileý sharalaryn qabyldamaý faktileri anyqtalǵan. Budan bólek, memleket menshigine ótetin múlikti esepke alý, saqtaý, baǵalaý jáne odan ári paıdalaný qaǵıdalaryn buzý faktileri tirkelgen. Mysaly, «Astana qalasy Sot aktilerin oryndaý departamenti» memlekettik mekemesiniń múlikti tárkileý bóliminde 3 jyl boıy memleket kirisine ótkizilmegen 30-dan astam zergerlik buıymdar men aqshalaı qarajat tabyldy.

Sonymen birge atqarý qujattaryn joǵaltý, kináli adam senip tapsyrǵan tárkilengen múlikti ysyrap etý, azamattardyń ótinishterin qaraý, sondaı-aq Qazaqstan Respýblıkasy Prezıdentiniń 1999 jylǵy 21 jeltoqsandaǵy №321 Jarlyǵymen bekitilgen QR memlekettik qyzmetshilerine ákimshilik jaza qoldaný qaǵıdasy tártibin buzý sııaqty óreskel zań buzýshylyq faktileri de anyqtaldy.

Osyǵan oraı, Departamentke prokýrorlyq tekserý barysynda anyqtalǵan zań buzýshylyqtardy joıý jáne aldaǵy ýaqytta da jol bermeý úshin pármendi sharalar qabyldaý, sot aktileriniń der kezinde oryndalýyna baǵyttalǵan zańda kózdelgen barlyq is-sharalardy tolyǵymen iske asyrý tapsyryldy.

Qala prokýratýrasy barlyq zań buzýshylyqtar boıynsha QR Ádilet mınıstrligine atalǵan zań buzýshylyqtarǵa jol bergen adamdardy jaýapkershilikke tartý máselesin qoıa otyryp, zań buzýshylyqty joıý týraly usynys engizdi.