Múlik ıeleri birlestigine kóshý merzimi ózgermeıdi

NUR-SULTAN. QazAqparat – Elimizdi páter ıeleri kooperatıvteriniń múlik ıeleri birlestigine nemese jaı seriktestikterge kóshý merzimi ózgermeıdi. Bul týraly «Qazaqstannyń turǵyn úı-kommýnalyq sharýashylyqty jańǵyrtý jáne damytý ortalyǵy» AQ basqarmasy tóraǵasynyń orynbasary Nurbek Serikov aıtty, dep habarlaıdy QazAqparat tilshisi.

«Qabyldanǵan zańǵa sáıkes 2021 jyldyń 7 qańtaryna deıin páterlerdiń, turǵyn emes úı-jaılardyń menshik ıeleri jınalys ótkizip, múlik ıeleri birlestigin nemese jaı seriktestikti tańdaý tıis bolatyn. Alaıda eldegi qazirgi sanıtarlyq-epıdemıologııalyq ahýal menshik ıeleriniń jınalys ótkizýine kedergi keltirgeni sózsiz. Osyǵan oraı COVID-19-dy taratpaý máseleleri jónindegi vedmostvoaralyq komıssııanyń usynysymen jınalystardy ótkizý merzimin keıinge shegerý týraly sheshim qabyldanǵan»,- dedi ol Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, múlik ıeleri birlestigine ne jaı seriktestikke tolyq ótý merzimi esh ózgerissiz qala beredi.

«2022 jyldyń 1 shildesine deıin basqarýdyń barlyq eski túrleri – páter ıeleri kooperatıvteri, páter ıeleriniń tutynýshylyq kooperatıvteri, tutynýshylyq kooperatıvter jańadan qurylǵan múlik ıeleri birlestigi men jaı seriktestikterge barlyq tehnıkalyq, qarjylyq jáne ózge de qujattaryn aktige sáıkes berýi tıis ári Qazaqstan Respýblıkasynyń zańnamasynda aıqyndalǵan tártippen joıylýy kerek», - dedi Nurbek Serikov.