Mýltfılm qurastyrý isin meńgerý ońaı bolǵan joq - Symbat Ábdirahmanova
Jas urpaqtyń dúnıetanymyn arttyrýda osylaısha aýqymdy ıgilikti isti qolǵa alǵan ol búginde jurtshylyqtyń ystyq yqylasyna bólendi. Búginde kóptegen dúnıelerdi el nazaryna usynyp úlgergen qyzylordalyq maman qolǵa alǵan jobalar óz mańyzdylyǵyn arttyryp keledi. Symbattyń qolynan shyqqan týyndylardy jahandyq jeli betterinen ońaı taýyp alýǵa bolady. Árdaıym óziniń ıdeıasymen, eńbekqorlyǵymen, jaýapkershiligimen kózge túsip júrgen Symbat Ábdirahmanova respýblıkalyq «100 jańa esim» jobasynda joǵary baǵalanyp, úzdikter qataryna endi.
«QazAqparat» HAA tilshisi óreli isimen ónege kórsetip júrgen Symbatpen atqarǵan jumysy men aldaǵy josparlary jaıynda suhbattasqan edi.
- Symbat, mýltfılm qurastyrýdy kóbine kádimgi mamandar atqaryp jatady. Mundaı jobalar Astana, Almaty qalalary sekildi megapolısterde jasalatynyna kózimiz úırengen. Qyzylorda qalasynda mýltfılm qurastyrý isin qolǵa alǵanyń tańǵaldyryp otyr. Buryn mundaı iste jınaǵan tájirıbeń bar ma edi?
- Bul men úshin tyń sala boldy. Alǵashqy mamandyǵym oǵan sáıkes kele qoımaıdy. Men 1988 jyly Qyzylorda qalasynda dúnıege keldim. Almaty qalasyndaǵy Abylaı han atyndaǵy halyqaralyq qatynastar jáne álem tilderi ýnıversıtetinde bilim aldym. Iran memleketinde arnaıy biliktilik kýrsynda tájirıbemdi arttyrdym. Irannyń Qazaqstandaǵy elshiliginde qyzmet atqardym.
Týǵan jerden jyraqta osyndaı birqatar qyzmetterdi atqaryp, beride Qyzylordaǵa qaıta oraldym. Mamandyǵym boıynsha jumys tabý qıynǵa soqty. 2012 jyldan bastap Qyzylorda oblysynyń bilim basqarmasy janyndaǵy oblystyq oqý ortalyǵynda qyzmet ettim. Onda tilinde múkisi bar balalarmen psıholog mamandyǵy boıynsha jumys jasadym. Qyzmetti atqarý barysynda balalarǵa arnalǵan qazaq tilindegi tanymdyq mýltfılmderdiń óte az ekenine kózimdi jetkizdim. Oılana kele sol dúnıelerdi ózim jasaýǵa sheshim qabyldadym.
- Bul jóninen burynnan tájirıbeń bar ma edi? Sebebi, anımatsııalyq dúnıelerdi jasaý ońaı sharýa emes qoı.
- Mýltfılm qurastyrý isin birden meńgerip kete qoıǵan joqpyn. Ras, alǵashqyda odan habarsyz edim. Bul oıymdy júzege asyrý úshin kóp izdenýge týra keldi. Osy maqsatta jahandyq jeliden qajetti málimetterdi izdedim. Sol baǵyttaǵy kóptegen beınematerıaldy sholyp shyqtym. Olardy ózim jasaýǵa árekettendim. Nátıjesi jaman bolǵan joq. Anımatsııalyq dúnıelerdi jasaýǵa qol jetkizdim. Alǵashqy mýltfılmdi qolǵa aldym. Ony daıyndap shyqtym. Qysqasy, árbir iske ynta-jigermen kirisseń, oılaǵan maqsatyńdy oryndap shyǵýǵa ábden bolady. Oǵan artyq shyǵyn jumsaǵan joqpyn.
- Buryn óziń jumys istep kórmegen salany meńgerý ońaıǵa soqpaǵany belgili. Ol saǵan qandaı dúnıelerdi úıretti?
- Men árbir jyly aldyma maqsat qoıamyn. Jyl boıy atqaratyn josparymdy naqtylap alamyn. Sol maqsatymdy oryndap shyǵýǵa kúsh salamyn. Máselen, bıyl qansha mýltfılm shyǵarýdy oılasam, atalmysh dúnıelerdi jasaýǵa basa nazar aýdaramyn. Qanshasyn shyǵardym? Olardyń qanshasyn oryndaı aldym? Osy baǵytta ózime esep beremin. Aldyma qoıǵan maqsatyma jettim be, jetpedim be? Sony tarazylap alamyn. Josparym belgili sebeptermen júzege aspaı jatsa, ony aldaǵy jyldyń enshisine qaldyramyn. Osylaısha aldyma úlken maqsattar qoıamyn.
Anımatsııalyq dúnıelerdi jasaýdan buryn ol jónindegi taqyrypty jan-jaqty zerdeleımin. Oǵan baılanysty derekter ábden pisip jetilýin oılaımyn. Sodan keıin ǵana baryp qolǵa alamyn. Byltyr eki mýltfılmdi josparǵa qoıǵan edim. Ol ekeýi de jasalyp shyqty. Bıylǵa da dál sondaı joba jasaımyn degen oıym bar. Kópshilikke bıyl eki mýltfılm tartý etsem deımin. Onyń biri tanymdyq bolsa, psıhologııalyq turǵydan jasalady. Ekinshisin halyqaralyq festıvalge usyný josparlanǵan.
- Anımatsııalyq dúnıelerdi jasaý barysynda ózge óńirlerdegi áriptesterińmen tájirıbe almasyp otyrasyń ba?
- Ázirge bul baǵytta tájirıbe almasqan joqpyn. Degenmen olar shyǵarǵan dúnıelerdi nazarda ustap otyramyn. Bizdiń óńirge kórshiles Shymkent qalasynda bul baǵytta qyzmet jasap jatqan arnaıy stýdııalar bar. Onda mamandar jas kórermender úshin qyzyqty dúnıeler jasap jatqanynan habardarmyn. Osy salada júrgennen keıin ol árbir mamannyń aldyna qoıǵan maqsaty bolady emes pe? Aldaǵy ýaqytta men de sol áriptesterim sekildi jumys aýqymyn keńeıtýge nazar aýdarsam deımin. Dese de ol úshin eń aldymen mol qarjy qajet ekeni belgili.
Aıta keterligi, meniń búginge deıin jasap shyqqan mýltfılmderime eshqandaı qarjy jumsalǵan joq. Otbasymnyń, dostarymnyń kómegimen halyqqa qajetti dúnıelerdi jasap kelemin. Syrt kózge ońaı kóringenmen, mundaı dúnıelerdi daıyndap shyǵarý ońaı dúnıe emes. Oǵan qansha ýaqyt ketedi. Máselen, mýltfılmdi dybystaý jaıyn aıta ketelik. Bul úshin de tájirıbeli maman qajet ekenin bilemiz. Onyń kásibı turǵydan sheberligi joǵary bolýy tıis. Ol akter mamany bolsa jasaǵan dúnıeńniń sapaly shyǵýyna septigin tıgizedi. Sondyqtan jumys aýqymyn keńeıtip, stýdııa ashý máselesin aldaǵy ýaqyttyń enshisine qaldyra turǵanymyz jón bolar.
- Áńgimeńe rahmet. Aldaǵy atqaratyn jobalaryńa sáttilik tileımin.
