Mýltfıl keıipkerleri naýqas balalardyń ońalýyna kómektesken
ASTANA. QazAqparat - Mýltfılm keıipkerleri sóıleý múmkindigi shekteýli balalardyń saýyǵýyna septigin tıgizgen. Bul týraly Astanada ótken «BI-Jýldyzaı» festıvaliniń barysynda balalady saýyqtyrý ortalyqtarynan kelgen mamandar aıtty.
11 jastaǵy Nurbaqyttyń osy kúnge deıin tili shyqpaǵan, ıaǵnı sóıleıalmaıdy. Dárigerler onyń keıbir músheleriniń damymaı qalǵanyn, sonyń ishinde sóıleý múmkindiginiń múldem damymaǵanyn aıtypty.
«Ol únemi ózdigimen jalǵyz júredi, eshkimmen sóılespeıdi, oınamaıdy, óziniń bólek álemi bar. Tek túsiniksiz dybystar shyǵarady. Munda «Baldáýrendegi» festıvalge kelgenimizde Nurbaqyt kúrt ózgerdi. Bul bir qudaıdyń qudireti bolar. Munda ózge balalarmen bolǵan tyǵyz baılanys, jaıly atmosfera oǵan oń áserin tıgizip otyr. Tuıyq balamyz sóılese bastady, mýltfılm keıipkeri mınondy óz kózimen kórgen kezde qýanyshtan kózi jana tústi, sezimderimen bólise bastady. Buryn-sońdy mundaı múldem bolmaǵan edi, ol adam balasymen sóılespeıtin. Aıtyp jatqanymyzdy túsinip otyrǵanyn bilmeı qınalatynbyz. Bolǵan jaıtty ata-anasyna aıtqanymyzda olar sengen joq», - deıdi Qyzylorda oblystyq balalardy saýyqtyrý ortalyǵynyń uıymdastyrýshy-pedagogy Sara Jánibekova.
Densaýlyǵyndaǵy oń ózgerister tek Nurbaqytta ǵana baıqalǵan joq. Sara Jánibekovamen Astanaǵa erip kelgen 10 jasar Banýdyń da damýynda tejeý bar. Ol Daýn sındromyna shaldyqqan. «Baldáýrende» bolǵan on kún ishinde Banýdyń densaýlyǵynda aıtarlyqtaı ózgerister oryn alypty.
«Banýmen tájirıbeli defektolog-mamandar jeke aınalysty. Ol óziniń sezimderin múldem syrtqa shyǵarmaıtyn. Óte tuıyq, únsiz edi. Al, lagerde júrgen kezde kóz aldymyzda ózgerip shyǵa keldi. Men muny sózben aıtyp jetkize almaımyn. Mýltfılm keıipkerlerin kórgen kezde ol da sóılep ketti. Biz endi bul balalardy damytý úshin ne isteý kerek ekenin bilemiz, sol baǵytta jumys isteıtin bolamyz», - deıdi qyzylordalyq pedagog.
Al, 14 jastaǵy Maırany festıvalge qatystyrý úshin Aqtaýdan óziniń ájesi Zııash Seıitqalıeva alyp kelipti. Jetkinshek sal aýrýyna shaldyqqan, ózdigimen júre almaıdy, qolarbaǵa tańylǵan. Astanaǵa kelgenge deıin ol da óte tuıyq bolatyn deıdi ájesi. Tek án aıtýdy jaqsy kóripti. Osy talantynyń arqasynda Astanadaǵy festıvalge joldama alǵan eken. Endi bul festıval Maıranyń ómirin kúrt ózgertip, úlken qýanyshqa bóledi. Buryn adamnyń kózine tike qaramaıtyn qyz jýrnalısterge suhbat berip, tipti, kamera aldynda án shyrqap berdi. Mundaı ózgeristi ájesi de kútpepti.
Aıta keteıik, dástúrge aınalǵan «BI-Jýldyzaı» festıvali jyl saıyn Astanada júzden astam densaýlyǵynda aqaýy bar daryndy balalardyń basyn qosady. Qatysýshylar elimizdiń 16 qalasynan iriktelip, Býrabaıdaǵy «Baldáýren» lagerinde ózara saıysqa túsedi. Al, festıvaldiń gala-kontserti Astanada ótedi.
