Muqtaj jandarǵa baspana bólý nelikten ákimdikten «Otbasy bankke» ótti

ASTANA. KAZINFORM – Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov turǵyn úı kezeginde turǵandarǵa baspana bólý nelikten ákimdikten «Otbasy bankke» ótkenin aıtty. 

Onyń atap ótýinshe, atalǵan ókilettikti bankke berý protsesti jedeldetip, ashyq qyla túsedi.

– Eń aldymen muny bir tereze qamtamasyz etedi. Bul – monıtorıng, baqylaý jáne bólýdiń jeńildetilgen tártibi. ıAǵnı, azamattardyń ákimdik tarapynan baspanany durys bólmeýine baılanysty shaǵymdaryna qatysty jaǵdaı joıylady. Endi munymen «Otbasy bank aınalysatyn bolǵandyqtan birinshiden baspana ashyq, ekinshiden ádil bólinedi. Barlyq jumys biryńǵaı aqparattyq júıe arqyly júrgiziledi. Bul da azamattarǵa yńǵaıly, - dedi ol Ortalyq kommýnıkatsııalar qyzmetindegi brıfıngide BAQ ókilderiniń saýalyna oraı.

Baqytjan Júnisbekovtiń aıtýynsha, azamattardy baspana kezegine qoıý qyzmetiniń bankke ótýi turǵyn úı alýdy jedeldetpeıdi. Óıtkeni, qarjy ınstıtýty baspanany bólýmen ǵana aınalysady. Al baspana kezeginiń tezirek jyljýy eń aldymen qurylys kólemine baılanysty.

– Elimizde áleýmettik te, naryqtyqtyq ta turǵyn úı qurylysyn yntalandyrý sharalary jumys istep tur. Bıýdjettiń múmkindigine qaraı áleýmettik turǵyn úı qurylysyn qoldaı beremiz. Keıingi jyldary turaqty ósim baıqalady, - dedi komıtet basshysy. 

Sondaı-aq ol memleket kommertsııalyq qurylysty damytý úshin jaǵdaı jasap otyrǵanyna nazar aýdartty. 

– Belgili bir sharttar, syıaqy mólsherlemesin sýbsıdııalaý kezinde ınfraqurylym júrgizý sııaqty yntalandyrý tetikteri bar. Bul sharalardy qurylysshylar belsendi qoldanady. Sondyqtan qurylys munan ary qarqyn alyp, al kezek jyldam qozǵalady dep oılaımyn, - dedi komıtet basshysy.

Buǵan deıin baspanaǵa muqtaj jandarǵa qandaı memlekettik kómek kórsetiletinin jazǵan edik.