Muqtaj jandar qurbandyq etin alýǵa ótinish bere alady – QMDB

ASTANA. QazAqparat – Qurban aıtta muqtaj jandar qurbandyqqa shalynǵan mal etin alý úshin onlaın túrde ótinish bere alady. Bul týraly Qazaqstan musylmandary dinı basqarmasynyń ýaǵyz-nasıhat bóliminiń meńgerýshisi Batyrjan Mansurov málim etti, dep habarlaıdy QazAqparat tilshisi.

«Qurban aıt merekesine oraı qurban shalý rásimderin ótkizý úshin bizdiń basqarma «QURBAN-2023» jobasy ázirlendi. «QURBAN-2023» jobasy onlaın jáne oflaın formatta iske asyrylyp jatyr. Respýblıka boıynsha ókildikterde qurban shalý rásimderi onlaın jáne oflaın formatta da ótkizilýde. Al, medreseler men qaıyrymdylyq mekemeler qurban shalý boıynsha tapsyrystardy jáne qurbandyq etterin tek oflaın formatta qabyldaýda, - dedi Batyrjan Mansurov ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, dinı basqarma ókili qurban aıtta onlaın formatta qurban shalý jáne ony muqtajdarǵa taratý rásimderin túsindirip ótti.

«QURBAN-2023» jobasy aıasynda onlaın formatta qurban shalý rásimderin ótkizý jáne ony muqtajdarǵa taratý úshin 2023 jyly16 maýsymnan bastap www.qurban2023.kz saıty iske qosyldy. Atalǵan saıtqa qurban shalý úshin tapsyrys berýshi tıisti ótinish qaldyra alady. Ol úshin saıtqa kirip, kórsetilgen nusqaýlyqtardy oryndaý qajet. Qurbandyq shalynǵandyǵy týraly esep vıdeo retinde tapsyrys berýshiniń Whats App nómirine joldanatyn bolady. Sondaı-aq, saıtqa muqtaj jandar da tirkelip, shalynǵan qurbandyq etin alý úshin onlaın túrde ótinish toltyra alady. Nátıjesinde shalynǵan qurbandyq etterin eriktiler ótinish qaldyrǵan muqtaj jannyń saıtta kórsetken mekenjaıyna etti jetkizip beredi», - deıdi ol.